Hatutan.com, (09 Abríl 2024), Díli—Polícia Ciêntífica e de Investigação Criminal (PCIC) liu hosi ekipa investigadór sira hahú loke prossesu averiguasaun hasoru membru ho inisiál OdCA ne’ebé deskonfia husu osan bá fujitivu Arnolf Teves Jr nia oan-mane liuhosi gravasaun audio iha média sosiál WhatsApp foin lalais ne’e.

Portavós PCIC, Mario Tavares hala’o konferensia imprensa. Foto: Elio dos Santos da Costa.

Portavós PCIC, Mário Tavares dehan, hanesan saida mak espalla ona iha média sosiál, prossesu internu bá iha membru ne’e la’o ona iha prosesu averiguasaun nia laran no tuir dokumentu ne’ebé nia assesu katak, averiguasaun ida-ne’e la’o durante loron sanulu hodi halo konkluzaun.

Lee Mós: Deskonfia, Pesoál Membru PCIC Husu Osan bá Oan-mane Fujitivu Teves Jr

“Medida ne’ebé mak foti ona maka loke ona prossesu averiguasaun hasoru pessoál ne’e. Tuir dokumentu ha’u assesu prossesu ne’e lao iha prazu loron 10 nia laran, atu haree pena saida, konkluzaun saida mak atu halo bá nia. Rekolla provas hotu, indísius hotu nune’e ita haree katak, sim, kulpadu, iha duni prosesu nia laran,” Portavós PCIC, Mario Tavares hatán bá Hatutan.com, liuhosi konferénsia imprénsa iha kna’ar fatin Colmera-Dili, Tersa (09/04/2024).

Xefe Sentrál Investigasaun Kriminál Polísia Sientífiku Investigasaun Kriminál ne’e dehan, hafoin prossesu averiguasaun ne’e, sei iha mós sansaun dixiplinár bá sira-ninia membru ne’e, maibé bainhira mak iha indísius bá iha komitmentu krime ruma ne’ebé mak OdCA komete, tenke partisipa bá Ministériu Públiku (MP) atu bele hatán.

“Ha’u atu hatán hanesan ne’e, ema ida-ida iha ninia responsábilidade bá aktu pessoál ne’ebé mak nia halo. Hosi aktu ne’e sé aktu pessoál, bá hatán pessoál. Ne’e ita bele dehan Oknum mak halo sasán sira hanesan ne’e. Ita-boot sira haree Arnolfo nia oan-mane ko’alia iha gravasaun, nia hateten iha ne’ebá, ne’e Oknum mak halo. Ne’ebé, ita iha prossesu judisiál hein hasoru nia, prosesu dixiplinár hein hasoru nia, nia bá hatán bá sasán ne’ebé mak nia halo,” nia esplika.

Ho hahalok ne’ebé membru PCIC ne’e komete, nia dehan, Superior sira deside ona aplika medida suspensaun provizóriu hosi servisu, hodi hein prossesu averiguasaun ne’ebé sei konklui hafoin loron sanulu, sura hosi Segunda (08/04) to’o Kuarta (16/04/2024). Maski nune’e, prossesu ne’e depende mós bá iha rezultadu averiguasaun.

Portavós PCIC ne’e adianta katak, hanesan funsionáriu públiku iha normas ne’ebé mak kesi, bainhira funsionáriu ida komete irregularidades ruma, iha estensoens sira ne’ebé previstu hotu iha estatutu Komisaun Funsaun Públika.

Tuir investigadór xefe ne’e katak, aktu ida hosi membru ne’e, pessoál, la’os reprezenta instituisaun PCIC. Sé halo análiza didi’ak bá liafuan ne’ebé membru ne’e ko’alia iha gravasaun, katak, nia husu osan pessoál bá nia an.

“Agora, osan simu ou la simu, investigasaun depois la’o mak ita haree. Dala-ida tán, ha’u informa iha ne’e, reforsa katak, aktu ne’ebé mak nia halo ne’e aktu pessoál, ne’ebé mak nia husu konserteza absolutamente katak, Guarda Prizionáis sira mós insatisfeitu bá hahalok ida ne’e. Entaun, aktu ne’e aktu pessoal, prosesu averiguasaun la’o, hein dixiplinár la’o, prosesu kriminál bele iha no nia bá hatán,” nia tenik.

PCIC la halo seguransa bá fujitivu Arnolfo Teves Jr, tanba PCIC nia servisu mak atu lori fujitivu ne’e bá iha audisaun primeiru interrogatóriu judisiál durante oras 48, hafoin ida-ne’e PCIC laiha tán ona servisu ho fujitivu refere.

Bainhira oknum refere aproveita situasaun ida-ne’e, nia na’in bá hatán. Sansaun bá pesoal sira refere nafatin bá estatutu funsaun publika, dezde represaun eskríta, multa, suspensaun, inatividade, to’o demisaun no iha PCIC nia servisu, iha Gabinéte Inspesaun no Auditória ne’e halo bá pessoal sira, no prosesu iha.

Hatán kona-bá karik iha lei ruma ne’ebé fó autorizasaun atu membru PCIC ka kualker membru autoridade polisial nian ida husu osan bá prezu sira, Mario Tavares dehan, lei ida ne’e la eziste iha Timor-Leste inklui kualker parte iha mundu.

Jornalista: Rogério Pereira Cárceres