Hatutan.com, (18 Abríl 2024), Díli—Prezidente Repúblika (PR), José Ramos-Horta husu bá Governu no Autoridade Munisípiu Díli (AMD) atu prepara fatin dignu bá komunidade ne’ebé hetan eviksaun, nune’e bele kontiua sira nia negósiu hodi sustenta ekonomia familia no kontribui bá dezenvolvimentu nasionál.

“Ha’u lakohi interfere iha kestaun sira ne’ebé pertense bá munisípiu Dili no Governu nia kompeténsia. Maibé ha’u sempre hateten bainhira hakarak muda ema sai hosi fatin ida liu-liu bá sira ne’ebé ho nesesidade, ho kosar, ho difikuldade hodi buka moris sira la halo problema, sira buka moris ho sakrifisiu loos iha loron manas la’o ba la’o mai no sira la na’ok ka asalta ema nia uma,” José Ramos-Horta hateten iha edifísiu INFORDEPE, Balide, Kinta (18/04/2024).

Lee Mós: AMD ho Forsa Polísia Hasai Família Uma-kain 54 iha Taibessi

Xefe Estadu dehan, loos duni katak labele halo fatin hotu-hotu halo sai merkadu maibé tenke halo diálogu no Governu prepara fatin foun no hadi’a merkadu ne’ebé iha daudaun ne’e, tanba merkadu sira ne’e insustentanvel loos hanesan merkadu Taibessi, Manleuana laiha kondisaun, hanesan laiha saneamentu, laiha bee moos.

Autoridade Munisípiu Dili tenke haree kestaun sira ne’e depois muda ema sira ne’e bá ka maski iha fatin públiku sira ne’e, estrada ninin sira ne’e tenke haree husik sira nafatin iha ne’ebá, maibé labele halo konstrusaun permanente, labele toba iha ne’ebá maibé hadi’a fatin ho dignidade atu dadersan bele lori sasán bá fa’an.

“Tanba situasaun sira ne’e sei iha konsekuénsia polítika eleisaun seluk mai sira ne’ebé uluk vota ba o ne’e sei lembra katak ha’u vota ba o depois tebes sai ha’u, no agora lalika mai hamaus fila fali,” Xefe Estadu esplika.

Ramos-Horta mós promete katak, sei ko’alia asuntu ne’e ho Primeiru Ministru  (PM) Kay Rala Xanana Gusmão iha enkontru semanál tanba Xanana Gusmão ema ida ne’ebé fuan sensivel tebes-tebes.

“Ha’u lembra bainhira Tribunál fó órden despezu hodi duni sai familia ida iha Bekcsi, avo Nana ba iha ne’ebá tur iha varanda hodi dezafia orden Tribunál nian, nia duni sai polísia no ida-ne’e hatudu nia sensibilidade,” Ramos-Horta haktuir.

Tuir observasaun Hatutan.com iha terrenu nota katak, Sekretáriu Estadu Asuntu Toponímia Organizasaun Urbana (SEATOU), Germano Santa Brites Dias serbisu hamutuk ho Autoridade Munisípiu Díli hodi halo evikasaun bá komunidade ne’ebé okupa rai sira iha área tasi ibun nian ne’ebé konstrui la dook hosi metro 50.

Eviksaun ne’e SEATOU hetan seguransa másimu hosi hosi Polisia Nasional Timor Leste, FALINTIL Forsa Defeza Timor Leste, Seguransa Sivil no Seguransa Munisipiu Dili nian.

Tuir observasaun mós Hatutan.com haree katak, komunidade evikante sira ne’e mós barak sei tau hela sasan iha espasu públiku nakloke no iha udan laran tanba seidauk iha fatin alternativu seluk atu hamahan an.

Jornalista: Vito Salvadór