Hatutan.com, (18 Abríl 2024), Díli—Parlamentu Nasionál (PN), liuhosi Komisaun B ne’ebé trata asuntu Negósiu Estrajeiru Defeza no Seguransa halo audiénsia ho Ministeriru Negósiu Estranjeiru no Kooperasaun (MNEK), hodi halo diskusaun bá Projetu Lei Númeuru 7/VI (1°) Protokulu Estadu.

Prezidente Komisaun B, Augosto Domingos “Deker” hateten, audiénsia públiku ho MNEK atu rona pontu de vista kona-bá Lei Protokolu Estadu ne’ebé mak rai hela to’o ohin loron.

Lee Mós: ASEAN Hato’o “Bem-vindo” Bá TL, Indonézia Oferese Fatin Estájiu Bá Funsionáriu MNEK

“Tuir Komisaun B nia haree, tanba ita-nia nasaun ne’e presiza duni iha Lei Protokulu Estadu ida atu bele organiza, trata instituisaun Estadu sira tuir nível ne’ebé mak iha,” Augosto Domingos Deker hateten iha PN, Kinta (18/04/2024).

Iha fatin hanesan, Vise-Ministra Asuntu ASEAN, Milena Rangel dehan, MNEK hetan xamada hosi komisaun B kona-bá Lei Protokolu Estadu, tanba ne’e maka ohin mai halo diskusaun hodi troka opiniaun balun atu hadi’a esbosu ne’ebé mak ejiste iha momentu ida ne’e, tanba ne’e sei kontinua nafatin la’o ho parte seluk mós.

“MNEK sei fila-fali bá haree boas pratikas ruma ne’ebé mak ejiste iha rejiaun atu lori fali mai, atu enrikesa didi’ak projetu Lei ne’e, tanba ita presiza duni ona atu iha Lei bá protokolu bá Estadu,” Milena Rangel hateten.

Nia esplika, esbosu Lei ne’e ko’alia iha asuntu lubuk ida, inklui iha lista Presidensiál nian atu haree fila-fali nune’e bele enrikesa hodi haree fila-fali boas pratikas ne’ebé mak ejiste para bele inklui, ka bele sai fila fali diskusaun kuandu Parlamentu Nasionál liu-liu komisaun B bolu fila-fali MNEK mai halo fali.

“Konsultasaun no diskusaun mais, sei iha oportunidade seluk mai haree fila-fali atu bele hetan lei ida ne’ebé mak di’ak hodi bele aplika iha ita nia serimonia Estadu nian, no serimonia ofisiais ne’ebé mak ita hala’o iha rai laran no mós ba misaun diplomátika iha rai liur,” nia haktuir.

Governante ne’e konsidera Timor-Leste nu’udár nasaun soberanu ida presiza duni atu iha nia Lei Protokolu Estadu.

Jornalista Estajiária: Zita Menezes