Hatutan.com, (19 Abríl 2024), Díli—Forsa konjunta kompostu hosi Polisia Nasionál Timor-Leste (PNTL) liuhosi Departamentu Investigasaun Kriminál (DIK), Servisu Informasaun Polisia (SIP), FALINTIL Forsa Defeza Timor-Leste (F-FDTL) liuhosi Unidade FALINTIL (UF) no Servisu Nasionál Intelijénsia (SNI), halo apreensaun bá evidénsia tabaku ho marka Pohon Sagu hamutuk kaixa 320 iha área Tasi-tolu, Díli.

Forsa konjunta halo apreensaun bá evidénsia tabaku ho marka Pohon Sagu hamutuk kaixa 320 iha área Tasi-tolu, Díli, Kinta (18/04/2024). Foto: Rogério Pereira Cárceres.

Informasaun ne’ebé Hatutan.com asesu iha Sesta 19 Abríl, katak, apreensaun ne’e akontese iha Kinta (18/04/2024), iha área Masin-lidun, aldeia 12 de Outubro, Suku Comoro, Postu Administrativu Dom Aleixo, Dili, hale’u tuku 09:27 dadeer, Otl.

Lee Mós: Joven Na’in-rua Hatama Sigaru Ilegál Hosi Atambua

Forsa konjunta halo atuasaun ida ne’e, tanba suspeitu sira hala’o atividade ne’ebé kontra bandu, iha ne’ebé deskonfia importa tabaku sira ne’e ho ilegalmente hosi rai viziñu Atambua, Nusa Tengara Timur (NTT), Repúblika Indonézia.

“Ekipa Konjunta haat ne’e maka halo intervensaun bá iha sasan kontra-bandu pohon sagu ne’e hamutuk karton-16, kaixa hamutuk 320, kada kaixa enxe falun-20 no totál hosi kaixa-320 ne’e humutuk falun 6.400,” Fontes ne’e informa bá Hatutan.com, Sesta (19/04/2024).

Hafoin halo tiha apreensaun bá evidénsia hirak ne’e, hosi horiseik tuku 10:00 ekipa investigadór sira Departamentu Investigasaun Kriminál nian, halo hotu kedan prosesu identifikasaun no investigasaun ho Númeru Kríme, NUC : 0090/24.PNSIC.

Nune’e, ohin tuku 10:00 dadeer, ekipa DIK Nasionál transporta kedan evidénsia hirak bá iha Ministériu Públiku (MP) ne’ebé mak hanesan na’in bá asaun penál, hosi prosesa tuir lei ne’ebé vigóra iha estadu RDTL.

Iha lei Kódigu Penál Timor-Leste, Artigu 316 ko’alia kona-bá Kontrabandu, iha alineda dahuluk esplika katak, sé maka importa ka esporta rikusoin ka merkadória sira la lori liuhosi alfándega sira ka kontrolu pasájen obrigatória seluk tama ka sai rikusoin ka merkadória sira hosi territóriu Timór-Leste nian, sei kondena ho pena prizaun hosi tinan 2 to’o 6 ka kastigu selu osan.

Iha mós alinea daruak hosi artigu ne’e nian, esplika kona-bá valór hosi rikusoin ka merkadória sira superiór hosi $10.000 ka enkuantu ema ne’e prátika faktu sira ne’ebé hakerek tiha iha númeru anteriór ho forma baibain maka sei kondena ho pena prizaun hosi tinan 2 to’o 8.

Jornalista: Rogério Pereira Cárceres