Hatutan.com, (19 Abríl 2024), Díli—Projetu konstrusaun altar misa hamutuk ho Papa Francisco iha Tasi-tolu, oras ne’e daudaun atinje ona 80%.
Supervizór Projetu konstrusaun altar misa ho Papa Francisco iha Tasi-tolu, Januário da Costa Pinto. Foto: Elio dos Santos da Costa.
Supervizór Projetu, Januário da Costa Pinto esplika, projetu kontrunsaun tama iha projetu emerjénsia hosi Governu ne’ebé fó diretamente bá kompañia Karya Timor-Leste, Unipesoal Lda mak ezekuta ho durasaun fulan haat, to’o fulan Jullu tenki entrega.
Lee Mós: Governu Aloka Millaun $12 bá Komisaun Altu Nivel Institusionál bá Vizita Papa Francisco
“Tanba ne’e ita-nia servisu agora ne’e ninia progressu atinje ona 80%. Hela de’it ona atu fui semente bá fatin sira ne’e ho altar,” Januário da Costa Pinto hateten bá Hatutan.com iha fatin konstrusaun Tasi-tolu, Sesta (19/04/2024).
Januário da Costa Pinto esplika, altar ne’e fabrika iha Indonézia no iha fulan Maiu nia rohan sei transporta mai Timor Leste no bainhira to’o mai halo de’it instalasaun, no hamoos fatin sira ne’e atu ema bele mai asiste.
Projetu konstrusaun altar misa ho Papa Francisco iha Tasi-tolu, oras-ne’e daudaun atinje ona 80%. Foto: Elio dos Santos da Costa.
Oras ne’e daudaun iha Timoroan na’in-13 no ema estranjeiru na’in-15 mak ativu hela iha servisu konstrusaun ne’e, kompañia garante katak to’o fulan jullu sei konklui hodi entrega bá Governu.
Governu liuhosi reuniaun Konsellu Ministru, iha Kuarta (28/02/2024), delibera hodi autoriza despeza to’o millaun $12 hosi fundu kontinjénsia bá Komisaun Altu Nivel Institusionál bá vizita Sua Santidade Papa Francisco.
Komunikadu bá Imprensa hosi Sorumutuk Konsellu Ministrus nian ne’ebé Hatutan.com asesu informa Konsellu Ministru delibera atu autoriza despeza to’o montante millaun $12 hosi Fundu Kontinjénsia bá Komisaun Altu Nivel Institusionál bá vizita Sua Santidade Papa Francisco, hodi organiza atividade preparasaun bá vizita refere.
Sekretariadu iha Motael
Ministru Administrasaun Estatal, 𝐓𝐨𝐦𝐚́𝐬 𝐝𝐨 𝐑𝐨𝐬𝐚́𝐫𝐢𝐨 𝐂𝐚𝐛𝐫𝐚𝐥, hanesan Vise Koordenador Jerál Altu Nivel Institusionál Vizita Papa Francisco no Koordenadór Jerál Interinu, hamutuk ho Koordenadór Jerál Ekipa Igreja bá Vizita Santu Padre nian mai Timor-Leste, 𝐃𝐨𝐦 𝐕𝐢𝐫𝐠𝐢́𝐥𝐢𝐨 𝐂𝐚𝐫𝐝𝐞𝐚𝐥 𝐝𝐨 𝐂𝐚𝐫𝐦𝐨 𝐝𝐚 𝐒𝐢𝐥𝐯𝐚, nomós Reprezentante Santa Sé iha Timor-Leste, 𝐌𝐨𝐧𝐬𝐞𝐧̃𝐨́𝐫 𝐌𝐚𝐫𝐜𝐨 𝐒𝐩𝐫𝐢𝐳𝐳𝐢, ofisialmente lansa ona Sekretariadu Komisaun Altu Nivel Institusional Vizita Sua Santidade Francisco mai Timor-Leste.
Lansamentu ofisiál ne’ebé hala’o iha Sesta (19/04/2024) ne’e iha rezidénsia eis Ministra Finansas Motael.
Jornalista Estajiária: Zita Menezes