Hatutan.com, (24 Abríl 2024), Díli—Sorumutuk Konsellu Ministru (KM) iha Palásiu Governu, Díli, Kuarta (24/04/2024) aprova Projetu Proposta Lei bá autorizasaun lejislativa kona-bá fiksasaun limite idade, relasiona ho serbisu funsionáriu públiku no ajente administrativu sira nian.

Reuniaun Konsellu Ministru IX Governu Konstitusional. Foto/Elio dos Santos da Costa.

Projetu Proposta Lei ne’e aprezenta hosi Ministru Prezidénsia Konsellu Ministru ein ezersísiu, Adérito Hugo da Costa.

Lee Mós: Polémika Rekrutamentu Funsionáriu Públiku-Kazuais, Xanana Orienta CFP Halo Diagnóstiku Nasionál

“Tui Governu, objetivu bá projetu Proposta Lei ida-ne’e maka atu Parlamentu Nasionál autoriza hodi fiksa limite idade ne’ebé fó kauza bá sesasaun relasiona ho serbisu iha Administrasaun Públika,” Hatutan.com sita komunikadu.

Iha komunikadu ne’e hateten, objetivu hosi projetu Proposta Lei ida-ne’e atu estabelese mekanizmu nesesáriu sira ne’ebé fó dalan atu promove profisionál joven sira iha Administrasaun Públika nasionál, nune’e bele lori kompeténsia foun bá iha funsionalizmu públiku.

Renovasaun bá kuadru iha Administrasaun Públika ne’e nu’udár medida esensiál ida atu assegura melloria servisu sira ne’ebé presta bá populasaun.

Ministru Prezidénsia Konsellu Ministru ein ezersísiu, Adérito Hugo da Costa esplika iha aprezentasaun ne’ebé partisipa mós komissáriu sira hosi Comissão Função Publica (CFP) hodi fiksa idade fiksu bá reforma obrigatóriu mak tinan 60.

Jornalista: Leopoldina de Carvalho