Hatutan.com, (25 Abríl 2024), Díli- Sekretáriu Jerál partidu FRETILIN, Mari Alkatiri, hateten tempu ona hodi lidér sira tuur hamutuk para buka solusaun bá problema edukasaun, saúde no problema sira seluk hodi lori povu ne’e bá moris di’ak.

Lee Mós: Mari Alkatiri Fó Korajen no Solidariedade Bá António Kalohan

Mari Alkatiri hateten lidér na’in  lima-neen hamutuk labarak ida, la’ós tán sira lidér istóriku, maibé saidá mak  tenke halo hamutuk hodi  halo balansu no no hateke bá oin

Mari Alkatiri sai oradór iha atividade reflesaun tinan 50 Monumentu Istóriku 25 Abríl “Deskolonizasaun iha Timor-Leste 1974-1975” ne’ebé organiza hodi Centro Nacional CHEGA, I.P, Kinta (25/04/2024). Foto/Elio dos Santos da Costa

“Ha’u nian laran moras kuandu ha’u haree ita nia joven barak bá buka servisu iha rai-li’ur. Ha’u la kontra migrasaun tanba ema tama rai-laran ita bá rai-li’ur, ha’u la kontra ida-ne’e, mais bá rai-li’ur tenke bá ho kualidade,” Marí Alkatiri  hateten bainhira sai oradór  iha atividade reflesaun tinan 50 Monumentu Istóriku 25 Abríl “Deskolonizasaun iha Timor-Leste 1974-1975”  ne’ebé organiza hodi   Centro Nacional CHEGA, I.P, Kinta (25/04/2024).

Fundadór nasaun no fundadór Estadu ne’e hateten joven sira lakon esperansa tanba sistema saúde no  sistema edukasaun la funsiona no ida-ne’e tuir Alkatir konsidera problema Timoroan hotu nian.

“Ami na’in neen tenke hanoin ida-ne’e, no ami na’in-neen tenke tuur hamutuk atu assume responsabilidade atu hateke bá oin atu rezolve problema bá edukasaun, saúde no buat hotu-hotu mais liuliu atu hametin estadu direitu demókratiku,” Alkatiri afirma.

Mezmu Alkatiri  temi sira na’in-neen, maibé la sita sira na’in-neen nee nia identidade ka naran. Maibé Alkatiri kontinua husu atu povu no liuliu joven sira tenke koñese istória ne’ebé real husi lidér istóriku sira.

 Jornalista Estajiária: Zita Menezes