Hatutan.com, (25 Abríl 2024), Díli – Uma-kain 40 ne’ebé hetan evokasaun obrigatóriu hosi Sekretaria Estadu Asuntu Toponímia no Organizasaun Urbana (SEATOU) iha Suku Bida Santa-Ana, Postu Administrativu Kristu Rei, Munisípiu Díli, seidauk hetan indenizasaun.

Lee Mós: Espasu Ne’ebé SEATOU Sobu Sei Halo Jardín

Komunidade nia uma iha foho lolon parte Bidau Santa-Ana nian hetan evikasaun. Foto/Lazaro Pereira Quefi

Hosi uma-kain 40 ne’e iha uma-kain 34 mak simu notifikasaun no uma-kain neen (6) ne’ebé hela iha foho-lolon ka laletek la hetan notifikasaun. Maibé, SEATOU ho nia ekipa halo eviksaun dala ida de’it tanba ne’e barak la preparadu no la konsege lori sai sira-nia sasan uma laran nian.

“Ha’u atu esklarese katak bá lala’ok eviksaun SEATOU halo ne’e nia negosiasaun ne’e maka notifikasaun ne’e de’it. Atu heteten loos de’it hosi parte SEATOU ho ministériu relevante hahú mai ne’e halo levantamentu dadus, hasai foto  bá komunidade sira ne’ebé mak hela iha fatin Estadu no tékniku sira mai sukat. Tuir fali, segundu mai ne’e manda ho notifikasaun de’it no hateten asuntu ida iha notifikasaun laran katak preparasaun hodi hamamuk fatin,” Xefe Suku Bidau Santa-Ana Alexadrino Mesquita da Costa Braz haktuir bá Hatutan.com, iha sede Suku Bidau Santa-Ana, Díli, foin lalais.

Kuandu notifikasaun ne’e ba iha komunidade sira ne’ebé okupa fatin estadu ne’ebé mak SEATOU sobu dadauk ne’e, tuir Xefe Suku ne’e katak, ema barak mak la simu ho razaun mai ho notifikasaun fó loron 21 tanba ne’e hahú iha loron 18 fulan-Marsu to’o  loron 07 fulan-Abríl 2024 tenke hamamuk ona.

“Notifikasaun ne’e kuaze komunidade balu seidauk hetan hanesan foin daudauk ita haree iha mídia públiku kestiona maka’as loos bá señora ida foin partu halo loron rua ka tolu, tanba sira la iha informasaun atu sobu sira-nia uma tanba uma-kain neen ne’ebé inklui mós uma-kain ida inan-feton foin partu ne’e la hetan notifikasaun,”  Xefe Suku Bidau Santa-Ana  informa.

Xefe  Suku  Bidau Santa-Ana triste tanba Estadu halo asaun ne’e obrigatóriu hodi hateten katak  hasai ema ne’e uza sistema ditadura la kria kondisaun uluk no la halo negosiasaun atu hetna konkordánsia mútua.

Asaun eviksaun SEATOU nian ne’e bazeia ba Lei númeru 8/2033 hodi hasai obrigatóriu abitante sira   ne’ebé utiliza rai Estadu ho espasu públiku.

Iha sorin seluk Feliciano do Santos da Silva ne’ebé nia fen foin partu loron tolu liubá informa atuasaun  SEATOU nian ne’e la refleta ondra umanidade tanba la iha informasaun ruma bá nia ho nia kaben atu hamamuk uma ne’e tanba okupa rai estadu.

“Ha’u rasik ko’alia ho ekipa dehan maun sira imi tenke komprende tanba ha’u nia ferik oan ho oan nurak foin moris loron rua, imi atu sobu uma ne’e ,agora udan-boot tan ami atu bá ne’ebé,” nia haktuir.

Inan-feton ho bebe ne’ebé foin partu loron haat tenke hela iha lona kiik nee nia okos tanba sira-nia uma hetan eviksaun iha Suku Bidau Santa-Ana, Díli. Foto/Lazaro Pereira Quefi

Rona tiha lia-hirak ne’e autoridade sira husu nia tuun direta bá hasoru SEATOU hodi informa kondisaun nia ferik-oan ne’ebé foin partu. Maibé seidauk hasoru SEATOU nia ekipa sobu daudaun ona uma ne’ebé bebe ho nia inan iha hela laran.

Feliciano do Santos da Silva dehan atu hasai ka hasees ema hosi Estadu nia fatin mós tenke ko’alia ho didi’ak tanba ne’e ema  la’ós animal.

“Notifikasaun ne’e mós ami la iha, sira nunka mai tur hamutuk ho komunidade sira atu ko’alia buat ruma to’o mai hasai derrepente de’it. Ami rona de’it dehan iha kraik ne’e mak sai, mas ami iha foho lolon ne’e la iha. Agora ami buka meus oinsá mós la iha ona tanba ami nia uma mak ne’e. Husik ba ami hela iha ne’e de’it,” Feliciano do Santos da Silva hateten.

Bebé ne’e hetan ona apoiu hosi Ministériu Solidariedade Sosiál hanesan foos, susubeen, aqua ho sasán dapur nian balu, estudante UNTL no ema balu mai ho privadu fó apoiu nesesidade bázika nian.

“Agora ha’u hein to’o Fulan ida mak Estadu desizaun la iha ha’u lori kalén taka fali ha’u nia uma,” ,” Feliciano do Santos da Silva afirma.

Jornalista Estajiáriu:  Lazaro Pereira Quefi