Hatutan.com, (24 Abríl 2024), Díli- Prosesu konstrusaun bá edifísiu Tribunál Judisiál Primeira Instánsia Díli (TJPID) hela de’it porsentu ida no tama ona bá faze finishing.
Lee Mós: Estensaun Dala-tolu no Pagamentu Millaun $3-resin, Konstrusaun Edifísiu TJPID Foin Atinje 67,70%
Edífisiu foun TJDIP iha Caicoli, Díli besik finaliza ona. Foto/Elio dos Santos da Costa
Prezidente Tribunál Rekursu (PTR), Deolindo dos Santos, hateten iha tempu badak bele halo ona inaugurasaun bá edifísiu foun TJPID nian ne’e tanba nia progresu ezekutsaun besik remata ona.
“Ita sei halo esforsu atu kompleta iha tempu badak nia laran para ita bele inaugura no bainhira inaugura bele uza kedas tamba sasán balun bá edifísiu ne’e hatama ona, no empreza sei kontinua mobiliza sasán hodi kompleta,” Prezidente Tribunál Rekursu, Deolindo dos Santos hateten bá jornalista sira iha edifísiu Tribunál Rekursu, Caicoli, Díli, Kuarta (24/04/2024.
Nia argumenta aleinde ne’e konstrusaun fíziku, problema seluk mak sei halo jestaun bá tempu atu bele haree ho sistema ne’ebé halo. Sistema ne’e mak atu esplika katak atu muda Tribunál Díli mai iha edifísiu foun ne’e tenke muda mós ho sistema ne’ebé mak iha.
“Avaliasaun ikus liu ne’ebé halo ba obra konstrusaun bá edifísiu Tribunál Judisiál Primeira Instánsia Díli ne’e atinje ona porsentu 90-liu, mais ne’e iha fulan hirak liu ba tiha ona no informasaun ikus husi empreza konstrutór katak hela porsentu ida para finaliza ne’e katak falta letra, buat balun ne’ebé presiza pinta no buat ki’ik oan sira seluk,” Nia informa.
Antes ne’e, Prezidente Tribunál Rekursu (PTR), Deolindo dos Santos, hateten konstrusaun Tribunál Judisiál Primeira Instánsia ne’e atraza tebes, tanba ne’e nia parte hala’o ona sorumutuk ho kompañia ne’ebé mak manan projetu ne’e atu bele aselera obra ne’e finaliza iha fulan-dezembru.
Nia hateten, obra ne’e atrazu tuir razaun hosi empreza kontraktor Xina Shadong International Economic and Tevhnical Cooperation Group R.P, katak dezeñu ne’ebé mak halo ne’e dala barak mai ho defeitu rasik ne’ebé presiza korresaun, obra ne’e komesa hosi pandemia Covid-19 ne’ebé prejudika mobiliza nesesidade ka materiál hosi rai-li’ur mai Timor-Leste, no obra ne’e hetan supervizaun ka kontrolu hosi Ministeriu Obras Publika, Komisaun Nasionál Aprovizionamentu (CNA) ho Ajénsia Dezenvolvimentu Nasionál (ADN) atu bele garante nia kualidade.
Projetu konstrusaun Tribunál Judisiál Primeira Instánsia Díli hahú iha loron 25 fulan-Novembru 2020, ne’ebé hetan supervizaun konsultóriu husi kompañia Decrea in association with AEC no kontraktor husi kompañia Xina Shadong International Economic and Tevhnical Cooperation Group R.P ho valór projetu $10.990.769,35
Jornalista: Vito Salvadór