Hatutan.com, (30 Abríl 2024), Díli– Prezidente komisaun E Parlamentu Nasionál (PN) ne’ebé trata asuntu Infra-estrutura, Marcos Xavier, husu bá Ministériu Obras Públiku atu foti prosesu tuir baze legál Rejime Jurídiku Aprovizionamentu (RJA) relasiona ho projetu obras publika 62 ne’ebé la iha formalizasaun kontratu.
Lee Mós: Projetu Obras Públika 62 Laiha Formalizasaun Kontratu
Pakote projetu reabilitasaun estrada ho esgotu iha área Aimutin, Díli. Foto/Dok.Tome da Silva
“Lista projetu ne’ebé mak Konsellu Administrasaun Fundu Infraestrutura (CAFI, sigla portugés) aprova iha 62, maibé nia prosesu bá oin ne’e ha’u seidauk hatene tanba seidauk iha informasaun ne’ebé membru Governu fó mai ami,” Deputadu Marcos Xavier hatán bá Hatutan.com iha PN, Tersa (30/04/2024).
Projetu obras publika 143 ne’ebé akontese iha 2017, tuir Deputadu Marcos Xavier katak iha projetu 90-liu mak hetan ona kontratu no hela de’it projetu mak seidauk hetan kontratu. Entaun iha momentu ne’ebá iha komisaun inkéritu ida kompostu husi Parlamentu Nasionál komisaun E ho Ministériu Obras Públika, Ajénsia Dezenvolvimentu Nasionál (ADN), Inspesaun Jerál Estadu hamutuk ho ekipa tuun bá verifika projetu ne’ebé ema bolu P44.
Iha verifikasaun ne’e sira identifika projetu 27 mak kompañia sira ne’e hala’o duni sira nian servisu no balu atinje 80%, 50% no balu foin mak atinje 25%
Nia haktuir tán projetu P44 ne’e iha livru orsamentu iha tanba sira haree orsamentu ne’e realoka hela de’it. Nune’e nia husu IX Governu liuhosi Ministériu Obras Públiku sei haree nia rekizitu sira oinsá mak bele hamosu kontratu bá projetu sira ne’ebé mak seidauk iha kontratu.
“Ha’u fiar katak iha fulan oin mai projetu hira mak sira sei selebra kontratu no ita boot sira bele bá husu iha MOP detallu liu nia bele oferese dadus sira ne’e bá públiku. Husi komisaun E ami foka liu bá fiskalizasaun no atu foti desizaun ne’e MOP, nune’e ami rekomenda bá Governu tenke aselera ona kontratu bá kontraktor sira ne’e maibé tenke tuir dalan legál no halo tuir rekizitu ne’ebé estabelesidu iha Rejime Jurídiku Aprovizionamentu (RJA),” Nia subliña.
Jornalista Estajiária : Zita Menezes