Hatutan.com, (06 Juñu 2024), Díli– Parlamentu Nasionál (PN) liuhusi Komisaun E ne’ebé trata asuntu Infraestrutura, Kinta (06/06/2024), halo audiénsia ho Ministru Obras Publiku (MOP), Samuel Marçal hodi diskute no buka hatene estatutu projetu 62 ne’ebé laiha formalizasaun kontratu ho Governu.  

Lee Mós: Governu Sei Prodús Rezolusaun Ida Atu Halo Pagamentu Bá Projetu 62 Ne’ebé Laiha Formalizasaun Kontratu

Ministru Obras Públiku (MOP), Samuel Marçal. Foto/Tome da Silva

Husi diskusaun ne’e Ministru Obras Públiku (MOP) Samuel Marçal deklara katak Ajénsia Dezenvolvimentu Nasionál (ADN) halo ona verifikasaun bá projetu 62 ne’ebé laiha kontratu nune’e projetu 21 mak sei selebra kontratu iha tinan ida-ne’e tanba Governu aloká ona orsamentu.

Projetu 62 ne’e iha pakote rua; pokete ida mak projetu 21 no pakote rua mak projetu 41. Nune’e, projetu pakote 21 ne’e uluk kedan ADN halo ona verifikasaun buat hotu kompletu ona, maibé Ministru Samuel Marçal hateten, orsamentu tinan ida-ne’e tau tiha ona, ne’ebé bá sira ne’ebé 100%  sei selu ka halo pagamentu no  bá sira ne’ebé mak seidauk 100% sei hein uituan, maibé tanba buat ne’e halo dekretu lei ida ne’ebé semana kotuk ne’e mak ata ne’e foin sai .

“Ami prepara hela iha kontratu kuandu ata ne’e sai mak ami prepara kontratu hodi bolu kompañia sira ne’e mai para konfirma ho sira para sira hakarak kontinua ka la kontinua depois mak sira sei asina kontratu tanba ne’e osan iha ona,” Ministrtu MOP Samuel Marçal esplika.

Projetu pakote 41 ne’e uluk kedan lista ne’e  iha polemikú, maibé orsamentu ne’e seidauk tau bá tinan ida-ne’e nian no mós seidauk halo verifikasaun no lahatene nian progresu ne’e to’o bainhira no hira.

Prezidente Komisaun E-PN, Marcos Xavier haktuir projetu 62 ne’e MOP espliká klaru katák agora atu selebra kontratu  iha de’it 21 ne’ebé orsamentu iha ona. Restu ne’ebé seidauk ne’e bá iha tinan 2025 sei iha verifikasaun husi ADN no mós Obras Públiku inklui mós Parlamentu Nasionál husi Komisaun E.

Jornalista Estajiária: Zita Menezes