Hatutan.com, ( 09 Maiu 2024), Díli—Governu liu husi Ministériu Komérsiu  no Indústria ( MCI, sigla portugés) fó adjudikasaun direita bá kompañia nasional Walgen walter10 unip.lda responsavel ba merkadu Taibessi no  Rheyna junior unip.lda bá merkadu Manleu.

Lee Mós: Atividade Merkadu Sira iha Díli Sei Menus Komprador

Ministru Komérsiu no Indústria (MCI), Filipus Nino Pereira, vizita Merkadu Manleuana, Díli, Sesta (28/07/2023). Foto/Elio dos Santos da Costa

Diretór Komérsiu internu, Gabriel da Costa hateten, durante ekipa  halo ona preparasaun bá reabilitasaun merkadu nune’e iha ona iha finalizasaun, kompañia rua  mak sei servisu, nune’e iha tempu badak sei termina servisu tuir kontratu ne’ebé halo ona.

“Liga ho eviksaun ne’ebé halo husi Sekretáriu Estadu asuntu Toponímia no Organizasaun Urbana ( SEATOU) ba vendedór sira iha espasu públiku, nune’e Governu presiza kria fatin ho dignu hodi vendedór sira bele utiliza bá negósiu,” Gabriel da Costa bá hateten jornalista sira hafoin hala’o enkontru ho kompañia sira, iha edifísiu MCI, Kinta ( 09/05/2024).

MCI sei koordena ho servisu jestaun merkadu no SEATOU hodi bele kontrola merkadu nune’e ema labele hela permanente.

Nia hateten kompañia ne’ebé manan projetu ne’e la liu husi konkursu públiku, maibé adjudikasaun direita husi ministériu ho razaun orsamentu ki’ik, nune’e halo de’it kotasaun, no mos ne’e servisu urjente.

Durasaun projetu ne’e fulan ne’e hahú hodi asina kontratu ne’ebé halo iha loron 08 fulan-Maiu 2024 ho nia kursu projetu reabilitasaun bá kada merkadu $100.000 no merkadu ra ne’e ho nia kustu hamutuk $200.000.

Reabilitasaun sei halo bá haris fatin,  fatin sira ne’ebé estragu ona, no aumenta espasu ba vendedór sira hodi halo negósiu.

Tuir dadus total vendedór iha merkadu Manleu  na’in-1.000 liu, no merkadu Taibesi na’in-2.000 liu.

Iha biban ne’e Diretór Kompañia Walgen Walter 10 unip.lda, Walter Martins hateten kompañia prontu ona hodi ezekuta servisu tuir kontratu ho Governu.

“Ami husi kompañia ami nia BoQ kompletu ona, orasida ami sei bá haree fatin nune’e bele hahú servisu loron aban ka bairua,” Diretór kompañia Walgen Walter10.unip.lda hateten.

Diretór kompañia  Rheyna Junior unip.lda, Zhunior Pereira hateten nia parte  garante servisu ho kualidade tuir alvu ne’ebé estabelese ona ho Governu.

Jornalista: Leopoldina de Carvalho