Hatutan.com, (13 Maiu 2024), Díli—Suku tolu foun, hanesan Bebonuk, Manleu no Madohi, Munisípiu Díli, Segunda (13/05/2024), kontinua eleisaun órgaun suku segunda volta hodi hili sira-nia lider komunitária ka xefe suku.
Lee Mós: Taxa Partisipasaun Eleisaun Suku Segunda Volta Sei Menus Bainhira Kontinua Sistema Manuál
Komunidade sira ne’ebé ejerse sira-nia direitu sívika iha eleisaun suku segunda ronde bá orgaun suku tolu ne’e tau esperansa boot iha xefe suku eleitu sira, inklui konsellu suku sira atu bele tau-matan bá problema sosiál iha suku laran.
![](https://www.hatutan.com/wp-content/uploads/2024/04/Eleisaun-Suku1-300x168.jpeg)
Situasaun Eleisaun Órgaun Suku primeira volta, Sábadu (27/04/2024). Foto/Dok.Leopoldina de Carvalho
Komunidade Aldeia 20 Setembru, Suku Bebonuk, Mariano da Costa Soares hateten eleisaun suku ne’e importante tanba lidér komunitáriu sira nia papél importante hanesan reprezententa governu sentra iha komunidade nia-leet atu tau-matan bá komunidade sira-nia problema no difikuldade sira.
“Ha’u tuir eleisaun suku tanba xefe suku mak Governu nia liman-ain bele lori it- nia problema sira ne’e to’o iha Governu sentrál hodi bele hetan solusaun,” Mariano da Costa Soares.
Cesar da Cruz dos Santos mós fundamenta katak tinan sira ikus ne’e suku Bebonuk koñesidu hanesan área risku tanba sempre akontese konflitu, nune’e nia husu xefe suku foun atu haree kestaun ne’e ho sériu.
Suku Bebonuk, Postu Admistrativu Dom Aleixo, Munisípiu Díli ho total populasaun 6.000, husi aldeia lima (5), Metin 1, Metin 2, Metin 3, Metin 4 Faulara ho Aldeia 20 Setembru.
Iha Manleu Taxa Partisipasaun Menus
Eleisaun orgaun suku iha Suku Manleu, Postu Administrativu Dom Aleixo, Munisípiu Díli iha segunda volta ne’e hatudu taxa partisipasaun menus.
Eleisaun segunda volta iha Suku Manleu hatudu Aldeia Badiak total taxa partisipasaun eleitór hamutuk 332, Feto 155, Mane 177 total populasaun 699. Kompara ho eleisaun dahuluk aldeia Badiak hamutuk taxa partisipasaun eleitór 362.
Aldeia Mane Mesak, Suku Manleu, total eleitó eldeia 905, partisipa iha eleisaun 468, feto 225, mane 243, enkuantu taxa partisipasaun eleitór iha eleisaun dahuluk 510
Taxa Partisipasaun iha Suku Madohi Mós Menus
Xefe Suku Madohi, Bernadino Ferreira konsidera eleisaun suku segunda volta ne’e taxa partisipasaun menus tebtebtes.
Tuir observasaun xefe suku Madohi nota katak aldeia 8 iha Suku Madohi enfrenta situasaun hanesan kona-bá menus partisipasaun tanba eleisaun ne’e hala’o iha loron segunda ne’ebé ema barak hala’o atividade normal servisu no eskola.
“Ita iha eleitór 11.332 maibé dala-ruma ida partisipa ne’e menus husi rihun 6 mai tanba ema idak-idak hala’o nia atividade,” Bernadino Ferreira hateten.
Tuir Bernadino impaktu husi taxa partisipasaun menus mak hanesan tanba loron eleisaun suku hala’o iha loron segunda-feira nune’e ema barak labele partisipa razaun servisu, eskola no mós iha eleitores balun nia kartaun eleitora la muda nia aldeia.
Bernadino mós husu ba membru ofisial Tékniku eleitorál hanesan STAE nó mós CNE husu kria estratéjika di’ak nune’e tinan-hitu (7) mai bele organiza eleisaun suku ne’e ho di’ak no gatante taxa partisipasaun másimu.
Suku Madohi iha aldeia 8 mak hanesan Aldeia Anin Fuik, Bato Tasi, Beto Leste, Loro Matan, Naroman, 7 de Desembro, Aldeia Rosario, Aldeia Terra Santa ho total abitante 23.401 ho Eleitór 11.332.
Lee Mós: Eleisaun Órgaun Suku 2024, Suku-Lima Hakat bá Segunda Volta no Taxa Partisipasaun Menus
Jornalista: Leopoldina de Carvalho