Hatutan.com, (09 Maiu 2024), Díli- TIMOR GAP, Empreza Públiku (TIMOR GAP, E.P.), Kinta (09/05/2024), liuhosi karta komunikadu imprensa klarifika katak notísia ne’ebé publika husi Hatutan.com iha loron 4 fulan-Maiu 2024, ho títulu “Konsidera Violasaun Kontratuál, ENERPROCO Lori TIMOR GAP ba Tribunál Internasional Arbitrajen”, TIMOR GAP, E.P. hakarak halo klarifikasaun katak, ho surpreza TIMOR GAP hatene kona-bá artigu ne’ebé Hatutan publika bá disputa entre TIMOR GAP no ENERPROCO no mensiona faktu ne’ebé falsu ka deskreve parsiálmente ho forma ne’ebé la loos.

Lee Mós: Konsidera Viola Akordu Kontratuál, ENERPROCO Lori TIMOR GAP bá Tribunál Internasionál Arbitrajen

TIMOR GAP nia jestór atuál no funsionáriu sira la hetan kontaktu husi  Hatutan no la fó informasaun ruma kona-ba disputa ne’e. Alein de ida ne’e, lori mós ba TIMOR GAP nia atensaun katak komunikadu imprensa ida-ne’ebé ENERPROCO fó sai ho asuntu hanesan, ninia konteúdu hanesan mós ho artigu ne’ebé iha Hatutan nian.

Komunikadu ENERPRO. Foto/Repro

Haree ba publikasaun ne’ebé la ho faktu no la loos, jestór TIMOR GAP nian ho espíritu transparénsia tomak, deside atu fó sai komunikadu imprensa ida-ne’e hodi hatuur lia-loos no klarifika faktu báziku balun ne’ebé relasiona ho alegasaun disputa ne’ebé iha, hodi defende onra no reputasaun TIMOR GAP nian.

Iha tinan 2020 asina ona Akordu Servisu ida entre jestór anteriór TIMOR GAP no ENERPROCO ho tipu kontratu adjudikasaun direta.

ENERPROCO nu’udar kompañia ne’ebé fornese servisu konsultór (consultant service), nia baze iha Houston (Texas) Estadus Unidus Amerika. ENERPROCO la’ós investidór ida iha Timor-Leste.

Faz parte husi Akordu Servisu entre TIMOR GAP no ENERPROCO, husi parte rua ne’e halo Akordu seluk ida hodi halo servisu ba Avaliasaun Téknika Kampu Bayu Undan (BU) Faze  2 CCS nian iha 16 Maiu 2023. Kontratu ne’e nia durasaun mak fulan 19 (hahú husi Maiu 2023 to’o Dezembru 2024).

“Tanba hare ba irregularidade sériu iha prosesu aprovizionamentu ba kontratu ne’ebé fó ba  ENERPROCO, no  mos fatór relevante sira seluk, no tuir nia direitu kontratuál, iha 18 Outubru 2023, TIMOR GAP fó sai karta terminasaun bá ENERPROCO,  ezerse nia direitu sira ne’ebé prevee iha Akordu Servisu mensiona iha leten. Iha karta terminasaun ne’ebé hanesan, TIMOR GAP mós husu suspensaun imediata bá atividade hotu-hotu ne’ebé relasiona ho Akordu Avaliasaun Téknika Kampu Bayu Undan (BU) Faze  2 CCS nian. Karta terminasaun ne’e hetan rekoñesimentu no simu husi ENERPROCO iha 25 Outubru 2023.” Hatutan.com sita komunikadu ne’e.

Hafoin karta terminasaun, atu proteje direitu no interese TIMOR GAP nian, TIMOR GAP husu ba ENERPROCO atu aprezenta relatóriu sira ho referénsia ba ámbitu servisu ne’ebé konkorda ona ho TIMOR GAP bá revizaun téknika hodi konfirma servisu ne’ebé ENERPROCO deklara hala’o ona tuir ámbitu akordu ne’ebé iha, hodi bele prosesa pagamentu sira. To’o ohin loron, TIMOR GAP selu ona fatura hotu-hotu ne’ebé ENERPROCO fó sai tuir akordu ne’e, no jestór atuál TIMOR GAP nian halo ona pagamentu ba fatura 5 bá ENERPROCO.

Alein de ida ne’e, ENERPROCO mós hetan benefísiu husi projetu TIMOR GAP sira seluk husi Outubru 2020 to’o Outubru 2023.

“TIMOR GAP surpreza uitoan haree ba publikasaun iha media nasionál kona-ba pedidu arbitrajen husi ENERPROCO bá Tribunal Kamara Internasional Komérsiu iha Singapura, bainhira diskusaun no klarifikasaun entre ekipa téknika ENERPROCO no TIMOR GAP sei kontinua la’o hela, liuliu kona-ba servisu sira ne’ebé hala’o hafoin TIMOR GAP hasai karta notifikasaun bá suspensaun servisu ENERPROCO nian.” Sita komunikadu ne’e.

TIMOR GAP la simu deklarasaun ne’ebé ENERPROCO halo kona-ba TIMOR GAP relasiona ho pagamentu ne’ebé ENERPROCO hato’o ba públiku. Tanba ne’e, TIMOR GAP sei afirma nia direitu sira iha forum ne’ebé apropriadu.

Jornalista: Vito Salvadór