Hatutan.com, (08 Maiu 2024), Díli–Hahú kedas hosi fulan-Janeiru to’o mai fulan-Maiu ne’e, Autoridade de Inspeção e Fiscalização da Atividade Económica, Sanitária e Alimentar, Instiuto Público (AIFAESA,I.P) la hala’o knaar supervizaun no inspesaun bá sasán sira iha loja, supermerkadu, no kioske sira tanba inspetór ne’ebé fó orientasaun servisu nia mandatu remata ona.
Lee Mós: Bankada CNRT Husu AIFAESA Halo Supervizaun ho Rigor bá Hahán Liu Prazu
Atividade inspesaun AIFAESA nian iha loja sira iha tempu sira liubá. Foto/Dok.AIFAESA
“Hahú husi Janeiru to’o mai loron 08 fulan-Maiu ne’e, funsionamentu AIFAESA iha terrenu bele dehan katak sidauk la’o. Ha’u nia mandatu remata iha loron 31fulan-Marsu, tinan ne’e, ha’u hato’o ona informasaun ba ministériu tutela Ministériu Koordenadór Asuntu Ekonomia (MKAE) kona-bá terminasaun mandatu,” Inspetór AIFAESA sesante, Ernesto Monteiro hateten bá Hatutan.com iha edifísiu AIFAESA, Kuarta ( 08/05/2024).
Iha fulan-Novembru 2023 iha notifikasaun husi MKAE hodi termina funsionáriu kontratadu sira nia servisu iha loron 31 fulan-Dezembru 2023 no Ernesto Monteiro hanesan Inspetór Jerál iha momentu ne’ebá kumpre desizaun ne’ebé iha hodi la prolonga no extende funsionáriu sira-nia kontratu.
Nia hateten, hanesan inspetór sesante ne’ebé mandatu remata ona iha loron 31 fulan-Marsu tinan ne’e, maibé tanba sidauk handover servisu bá inspetór foun ne’ebé dau-daun ne’e sidauk iha, nune’e preokupa ho funsionamentu instituisaun públiku ida-ne’e. tanba ne’e, ministériu relevante bele aselera nomeasaun inspetór jerál foun hodi kontinua hala’o knar atendimentu públiku.
Nia esklarese tan katak dau-daun ne’e servisu administrasaun AIFAESA mós ladún la’o ho di’ak maske antes ne’e nia hato’o ona pedidu bá iha Komisaun Funsaun Públika (CFP, sigla portugés) nune’e apoiu duni funsionáriu na’in-haat hodi apoiu, maibé ne’e labele responde bá ekipa inspesaun no fiskalizasaun iha terrenu.
Liuhusi plenáriu Parlamentu Nasionál, Tersa (07/05/2024), Membru Bankada Parlamentár CNRT, Deputada Ângela Córvelo iha nia intervensaun husu bá AIFAESA atu halo supervizaun rigor bá loja sira ne’ebé fa’an sasán no hahán liu prazu.
Iha fatin hanesan Deputada Bankada CNRT, Carminda Carlota konkorda ho preokupasaun Deputada Ângela Córvelo nian ne’e tanba realidade iha loja barak ne’ebé daudaun ne’e fa’an produtu importadu sira ne’ebé liu prazu hodi prejudika saúde públiku.
Hatán bá preokupasaun ne’e, Inspetór Jerál AIFAESA sesante, Ernesto Monteiro konsidera preokupasaun husi deputada bankada CNRT iha parlamentu Nasional hanesan meiu ida nune’e bele ajuda Governu haree kestaun AIFAESA.
Nia mós husu ba Deputadu sira atu labele husu de’it, maibé iha komunikasaun mós ho ministériu relevante nune’e bele aselera prosesu nomeasaun bá inspetor jerál foun AIFAESA nian.
Jornalista: Leopoldina de Carvalho