Hatutan.com, (20 Maiu 2024), Díli- Estadu Timor-Leste liuhusi Prezidente Repúblika (PR), José Ramos-Horta, Segunda (20/05/2024), kondekora Liurai Brunei Darussalam Majestade H. Hassanal Bolkiah ho medalla Grande Colar Ordem de Timor-Leste nu’udár rekoñesimentu bá nia lideransa no kontribuisaun bá pás no estabilidade iha rejionál.
Lee Mós: Horta ho Xanana Tuun Direta Simu Liurai Brunei Darussalam Majestade H. Hassanal Bolkiah
![](https://www.hatutan.com/wp-content/uploads/2024/05/Brunei-Darussalam-300x182.jpeg)
Prezidente Repúblika (PR), José Ramos-Horta, kondekora Liurai Brunei Darussalam Majestade H. Hassanal Bolkiah ho medalla Grande Colar Ordem de Timor-Leste, Segunda (20/05/2024). Foto/Elio dos Santos da Costa
Iha diskursu Prezidente Repúblika José Ramos-Horta hateten, Timor-Leste komemora loron ida ne’ebé importante, 20 Maiu. Povu tomak iha ne’e hamutuk ho bainaka boot ida, Liurai Brunei Darusalam Majestade H. Hassanal Bolkiah.
“Ita simu liurai boot ne’e, iha ukun nia laran, iha tempu dame ho unidade iha Brunei Darussalam. Brunei Darussalam kontribui makas bá dame no estabilidade iha rejiaun ita nian. Ita agradese ba liurai-boot, ne’ebé hahú ita-nia independénsia kedas, buka tulun no sempre apoiu ita, loke oportunidade iha ne’e para Timor-Leste tama ASEAN. Ne’e duni, agradese bá povu tomak ne’ebé ohin simu liurai-boot iha ita nia sidade Díli,” Prezidente Repúblika José Ramos-Horta hateten iha Palásiu Prezidensiál iha ámbitu selebrasaun loron restaurasaun independénsia bá dala-XXII (20 Maiu 2002-20 Maiu 2024).
Biban hanesan Liurai Brunei Darussalam Majestade H. Hassanal Bolkiah hateten bá dala uluk espresa profunda gratidaun bá jenerojidade no laran luak hodi simu no fó rekoñesimentu bá nia kontribuisaun bá pás no estabilidade ho medalla Grande Colar Orden Timor-Leste.
Nia afirma ida hanesan rekoñesimentu ida ne’ebé refleta nasaun Timor-Leste nia identidade no kultura.
![](https://www.hatutan.com/wp-content/uploads/2024/05/Brunei-Darussalam1-300x186.jpeg)
Liurai Brunei Darussalam Majestade H. Hassanal Bolkiah sai bainaka espesiál iha komemorasaun loron restaurasaun indepéndensia bá dala-XXII, Segunda (20/05/2024). Foto/Elio dos Santos da Costa
“Ida ne’e reflete konsiderasaun ne’ebé aas liu no mós relasaun traballu no armonia entre povu Brunei ne’ebé hetan ona ho Repúblika Demokrátika Timor-Leste,” Liurai Brunei Darusalam Majestade H. Hassanal Bolkiah haktuir.
Liurai ne’e hein katak áa futuru atu hetan benefísiu husi parte rua, hasa’e liután no hametin liután relasaun bilaterál ne’ebé di’ak liu iha nivel hotu-hotu iha tinan hirak oin mai.
Jornalista: Vito Salvadór