Hatutan.com, (16 Maiu 2024), Díli- Prezidente Repúblika (PR), José Ramos-Horta kondekora Profesóra Dewi Fortuna Anwar ho medalla Colar Ordem Honorifica Timor-Leste nian.
Lee Mós: Membru Polísia Indonézia Simu Kondekorasaun Hosi Prezidente Repúblika Ramos-Horta
![](https://www.hatutan.com/wp-content/uploads/2024/05/RH-300x193.jpeg)
Prezidente Repúblika, Ramos-Horta Kondekora Dewi Fortuna Anwar ho Medalla Colar Ordem Honorifica Timor-Leste, Kinta (16/05/2024). Foto/Elio dos Santos da Costa
Akademiku no figura polítika koñesidu Indonézia nian, Profesóra Dewi Fortuna Anwar, agora daudaun hanesan Profesóra Peskiza iha Sentru Peskiza ba Polítika-Ajénsia Nasionál bá Peskiza no Inovasaun (PRP-BRIN), Prezidente Konsellu Administrasaun iha Sentru Habibie, no Akadémiku iha Komisaun Siénsia Sosiál (AIPI).
Dewi Fortuna Anwar harii hamutuk Komisaun Polítika Estranjeiru Indonézia nian no hala’o ona knaar asesória ba organizasaun internasionál oin-oin, inklui Konsellu Konsultivu Sekretáriu Jerál ONU nian kona-ba Asuntu Dezarmamentu.
Dewi Fortuna Anwar nu’udar asesora ida-ne’ebé besik liu ho Prezidente Habibie iha 1999 bainhira Nia konkorda ho referendum iha Timor-Leste, iha ne’ebé 78.50% vota bá independénsia husi Indonézia.
Komunikadu imprensa ne’ebé Hatutan.com asesu, Kinta (16/05/2024), relata hafoin serimónia kondekorasaun, Prezidente Ramos-Horta organiza Serie Palestra Prezidensiál II tinan 2024 ho tema “Seguransa Rejionál no Diplomasia iha Sudeste Aziátiku, Dezafiu no Oportunidade sira.
“Palestra ne’e ho objetivu atu fornese vizaun komprensivu ida kona-ba dezafiu no oportunidade signifikativu sira ne’ebé Sudeste Aziátiku hasoru daudaun iha área seguransa no diplomátika. Liuhusi promove kompriensaun kle’an liután kona-ba dinámika hirak-ne’e, ho fokus espesífiku ba sira-nia impaktu ba Indonézia no Timor-Leste, palestra ne’e hakarak kontribui ba diskusaun informadu no solusaun kolaborativu ba rejiaun ida-ne’ebé estavel no prósperu liu,” Hatutan.com sita komunikadu.
Profesór Dewi Fortuna Anwar hato’o palestra ne’e, hodi fahe nia esperiénsia lubun boot iha akadémika, governu no aktivizmu hodi analiza senáriu atual seguransa nian no esforsu diplomátiku sira iha rejiaun laran. Nia esperiénsia mak iha polítika esterna Indonézia nian, demokratizasaun, ASEAN, no asuntu polítika no seguransa rejionál. Palestra ida-ne’e fó atensaun partikulár ba oinsá dinámika hirak-ne’e fó impaktu ba Indonézia no Timor-Leste.
Palestra Prezidensiál Serie II kona-ba “Seguransa Rejionál no Diplomasia iha Sudeste Aziátiku, Dezafiu no Oportunidade sira” hetan partisipasaun husi audiénsia barak iha Timor-Leste ne’ebé interese ba Asuntu Sudeste Aziátiku.
Jornalista: Vito Salvadór