Hatutan.com, (22 Maiu 2024), Díli—Prezidente Repúblika (PR), José Ramós-Horta fó posse bá Embaixadór dezignadu Timor-Leste (TL) nian bá Repúblika Sosialísta Vietnam, João Pereira no Lizualdo Gaspar nu’udár Embaixadór foun bá Malázia.

Prezidente Repúblika, José Ramos-Horta, fó pose bá João Pereira nu’udár Embaixadór foun Timor Leste nian bá Repúblika Sosialísta Vietnam ho Lizualdo Gaspar nu’udár Embaixadór foun bá Malázia, iha Palásiu Prezidensiál, Aitarak Laran Díli, kuarta (22/05/2024). Foto: Elio dos Santos da Costa.

José Ramós-Horta iha serimonia posse ne’e ko’alia liu kona-bá relasaun bilaterál ne’ebé forte no amigável, ne’ebé Timor-Leste  estabelese ho Repúblika Sosialísta Vietnam no Malázia, ne’ebé harii ho respeitu no kooperasaun ba malu dezde independénsia iha 2002.

Lee Mós: Luis Miguel Embaixadór Dezignadu bá Repúblika Mosambique

Prezidente Repúblika hato’o ninia agradesimentu ba apoiu dedikadu hosi Malázia mai Timor-Leste dezde independénsia, inklui kontribuisaun ba misaun manutensaun ba pás, fasilita ligasaun aereu durante pandemia COVID-19, no organiza misaun diplomátika dahuluk Timor-Leste nian iha rai-li’ur.

Timor-Leste no Vietnam asina tiha ona akordu enkuadramentu kona-ba tékniku, kooperasaun ekonómika no komérsiu, negosiasaun sira la’o hela ba akordu adisionál sira kona-ba servisu aereu, protesaun ba investimentu, no seguransa ai-han.

“Hau iha konfiansa tomak katak Embaixadór Gaspar no Pereira sei reprezenta interese ita-nia nasaun nian no sei hametin liután lasu amizade no kooperasaun entre Timor-Leste ho Malázia no Vietnam respetivamente,” Prezidente Repúblika hateten iha Palásiu Prezidensiál Nicolau Lobato Bairru-Pité, kuarta (22/05/2024).

Xefe Estadu dezeza sussesu ba Embaixadór foun sira atu hametin liután relasaun ho parseiru rejionál importante sira no halo promósaun ba interese sira Timor-Leste nian iha rai-li’ur.

Embaixadór Estraordináriu no Plenipotensiáriu Repúblika Demokratika Timor-Leste nian ba Malázia Lisualdo Gaspar hateten agradese ba Estadu no Governu Timor-Leste ne’ebé depozita konfiansa atu bele lori misaun diplomátika nudar reprezentanteestadu iha Malázia.

João Pereira nu’udár Embaixadór foun Timor Leste nian bá Repúblika Sosialísta Vietnam. Foto: Elio dos Santos da Costa.

Nia afirma Malázia nu’udár país importante tebes ba Timor-Leste. Governu no povu Malázia sempre apoiu Timor-Leste iha momentu difisil sira, hahu iha 1999 Malázia haruka forsa no polisia mai tulun restaura Timor-Leste nia estabilidade no depois de krize interna iha 2006, Malázia kontinua fo apoiu seguransa hodi restaura estabilidade iha Timor-Leste.

“Nudar Embaixadór foun Timor-Leste nian ba Malázia ha’u sei kontinua hametin kooperasaun iha area Edukasaun, Agrikultura, Saúde no Defeza. Ita hatene Malázia mós apoiu adezaun Timor-Leste nian ba ASEAN, tamba ne’e ha’u sei servisu makas ho dedikasaun para atu eleva liután ita nia relasaun ho Malázia,” Lisualdo Gaspar hateten.

Iha fatin hanesan Embaixadór Estraordináriu no Plenipotensiáriu Repúblika Demokratika Timor-Leste nian ba Repúblika Sosialista Vietnam João Pereira  hateten simu responsabilidade nudar Embaixadór hodi kumpri no ezekuta servisu hotu atu garante relasaun bilaterál entre país rua.

Lizualdo Gaspar nu’udár Embaixadór foun bá Malázia. Foto: Elio dos Santos da Costa.

“Ita hotu hatene iha tinan tolunulu ikus ne’e Vietnam nia Ekonómia sae makas no iha Sudeste Aziatiku nia dezenvolvimentu ekonómiku lao kapas. Tamba ne’e hanesan Embaixadór sei halo servisu hotu atu fortalese kooperasaun ekonomia ho Vietnam no lori investor sira Vietnam nian mai investe iha ita nia rain,” João Pereira hateten.

Nia hatutan Repúblika Sosialísta Vietnam mós iha dezenvolvimentu makas mós iha area Teknolojia, Telekomunikasaun no Industria sira seluk tamba ne’e sei explora oportunidade hotu atu bele hetan apoiu ba dezenvolvimentu ekonómiku iha Timor-Leste

Esperiénsia profesionál

Embaixadór Estraordináriu no Plenipotensiáriu Repúblika Demokratika Timor-Leste nian ba Malázia Lisualdo Gaspar nudar Diplomata ida-ne’ebé iha esperiénsia liu dékada rua, Embaixadór Lisualdo Gaspar servisu iha kargu seniór oin-oin iha Ministeriu Negosius Estranjeirus no Kooperasaun dezde 2001, inklui kargu sira hanesan Embaixadór Nova Zelándia, Ministru Konselleiru iha Jakarta, no Sekretáriu Segundu iha Canberra.

Embaixadór Estraordináriu no Plenipotensiáriu Repúblika Demokratika Timor-Leste nian ba Repúblika Sosialista Vietnam João Pereira iha esperiénsia ne’ebé luan hosi servisu ba Nasoins Unidas no governu Timor-Leste iha governasaun, administrasaun públika no edukasaun. Mais resentemente nia servisu nu’udar asesor ba Prezidente iha asuntu Relasaun Internasionál hosi 2022-2024.

Jornalista: Vito Salvadór