Hatutan.com, (31 Maiu 2024), Díli-Ekipa fiskalizasaun konjunta kompostu hosi Comissão Anti Corrupção (CAC) ho Comissão da Função Pública (CFP) hahú  hala’o vizita surpreza ka fiskalizasaun bá instituisaun Governu ida-idak hodi  haree  besik liután fiunsionáriu sira nian efetividade servisu.

Lee Mós: Rekruta Funsionáriu Liu 300 La Tuir Prosedimentu, PLP Husu CAC ho PDHJ Investiga MI

Funsionáriu MAPPF sira bá servisu tarde bainhira CAC ho CFP hlao vizita fiskalizasaun iha ministériu ne’e iha Sesta dadeer (31/05/2024). Foto/Tome da Silva

Komisáriu Komisaun Funsaun Públika nian bá Asuntu Dixiplinár, Agapito da Conceição, ne’ebé lidera direta atividade fiskalizasaun bá iha Ministériu Komérsiu no Indústria, foin lalais ne’e,  informa katak vizita surpréza ida ne’e ho objetivu atu haree besik liu funsionáriu sira nia atividade lorloron nian, liu-liu bá sira-nian prezensa tama servisu ne’e tuir oras ka lae (pontualidade).

Iha Estatutu Funsaun Públika nian Lei-Númeru 8/2004 alteradu bá Lei-Númeru 5/2009, hatete katak, loron ida, funsionáriu sira tenke mantein servisu iha eskritóriu durante oras ualu (8), hahú husi tuku 08:00 dadeer, sai fali tuku 12:30, (han meiudia) no tama fali tuku 13:30 lorokraik to’o fali tuku 17:30 sai servisu hodi fila uma.

“Ida ne’e maka tuir lei. Tanba ne’e maka funsionáriu sira tenke kumpri oras ne’ebé hatete tiha ona iha lei. Mais, iha ami ekipa konunta nia vizita primeiru ne’e ami deteta buat barak, ida mak funsionáriu sira barak maka tama servisu tarde. Mais depois ami sei fó sai iha relatóriu,”  Komisáriu Agapito da Conceição hatán bá Hatutan.com, hafoin halo vizita surpréza bá Ministériu Agrikultura Peska, Pekuária no Floresta (MAPPF) iha Comoro-Díli, Sesta (31/05/2024).

Bá funsionáriu sira ne’ebé mak tama serbisu la tuir oras ka tama servisu tarde, sei hetan sansaun, ida maka ko’a sira nian saláriu, seluk fali sei fó represaun eskríta ka suspensaun bá sira. Maibé, komisáriu CFP ne’e dehan, rezultadu hosi sira-nian fiskalizasaun konjunta ida ne’e sei fó sai liuhosi relatóriu ne’ebé dadaun ne’e sira elabora hela.

Iha Dekretu Lei Númeru 21/2021, 10 Novembru kona-bá “Cria Subsidio Mensal de Transporte” iha ne’ebé oras ne’e aplika ona bá iha funsionáriu órgaun titulár no kargu xefia sira iha instituisaun públiku. Tanba ne’e, funsionáriu sira ne’ebé ho kargu xefia laiha ona autorizasaun atu lori karreta estadu ka kareta servisu nian fila bá uma.

Diretór jerál ba Prevensaun no Sensibilizasaun CAC, Rosario Salsinha Araújo, hateten vizita bá ministériu sira ne’e ho hanoin ida hakarak kuda kultura di’ak iha ita nian estadu. Sé mak hakiak kultura ne’e, funsionáriu públiku sira.

Ekipa CAC ho CFP halo fiskalizasaun iha MCI, foin lalais ne’e. Foto/Mídia CFP

Iha lei hatete ida ne’e, servisu oras ualu ne’e nein kotu. Mais, labele aproveita fali momentu hirak hanesan ne’e, atu la tama ka falta servisu tuir sira nia hakarak, no asina lista prezensa mós tuir sira nian hakarak. Funsionáru sira labele halo ida ne’e, tanba viola lei no fó prezuiju boot bá estadu.

“Estadu konta no sura oras ida mai servisu ne’e, oras ualu ne’e mak hodi selu funsionáriu públiku. Loloos, labele halo ida ne’e, funsionáriu sira tenke konsiente ona. rai ne’e ukun-aan atu hadi’a. Ha’u hanoin Nonu-Governu ho ninia prinsípiu boa-governasaun ida hatete dehan hadi’a jestaun estadu. Ida ne’e mak ita halo,” dehan Rosario Salsinha.

Diretór jerál bá asuntu Prevensaun no Sensibilizasaun CAC nian ne’e dehan, kuandu koalia kona-bá asuntus korrupsaun, la’os de’it kona-bá ema na’ok osan-boot. Maibé, liga bá asuntu sira ema faltas servisu, ema la kumprimenta bá lista prezensa sira ne’e.

“Hakerek sasán hosi oitu oras, seidauk to’o lokraik, nia priénxe tiha ona absensia dadeer nian to’o loraik dala-ida de’it. Ne’e violasaun boot. Sasán hirak ne’e parte bá koruptus ida, maibe, nia iha hela nivel ida ki’ik, ami sei hato’o relatóriu ne’e bá funsaun públika atu hola medidas,”  nia afirma.

Vise–PM Francisco Kalbuadi Lay Husu Funsionáriu Sira Kalma

Vise Primeiru Ministru, Ministru Koordenador bá Assuntu Ekonómiku, Ministru Turizmu no Ambiente, Francisco Kalbuadi Lay. Foto/Espesiál

Hatán kona-bá vizita surpreza hosi CAC ho CFP nian ne’e Vise-Primeiru-Ministru, Ministru Koordenadór Asuntus Ekonómiku no Ministru Turizmu no Ambiente, Francisco Kalbuadi Lay, husu bá funsionáriu sira atu atu lalika hakfodak, husik bá instituisaun ida-idak hala’o nia funsaun.

“Derepente CAC ho CFP bá iha MCI. Ita lalika hakfodak, sé ita servisu di’ak hela, funsaun públika ho CAC, sira iha sira-nia kna’ar rasik, ne’ebé maka ita tenke respeitu, di’ak tebtebes, sé sira halo bebeik inspesaun hanesan ne’e, nune’e, ha’u mós rona, ha’u haree iha televizaun, funsaun públika hatete dehan mais, la’ós atu haree funsionáriu sira nia sala ka saida-saida, laiha,” Francisco Kalbuadi Lay hatán, foin lalais ne’e.

“Sira bá ne’e, atu haree, alende funsionáriu sira nia serbisu dixiplina ka lae, tama ho oras ka lae. Sé falla, sei iha sansaun, sé lae, husik bá. Mais, ami mós atu haree karik sira nia serbisu hetan, parte administrasaun nian liu-liu fasilidade sira, di’ak ka la-di’ak, ami mai para atu fó hanoin, nune’e mós fó lembra bá Governu, nune’e, ministériu ida-idak bele la’o ho di’ak,” nia  hateten.

Tuir nian, CAC ninia funsaun mós  dehan iha nasaun kualker ida atu la’o ho di’ak, primeiru, tenke opozisaun ida di’ak, segundu, tenke mós iha instituisaun sira ne’ebé mak halo sira nian serbisu hanesan ezekutivu, balu mós tenke halo fiskalizasaun, no CAC hala’o sira nia serbisu hanesan fiskalizasaun.

Funsionáriu Públiku (FP) ne’ebé asume kargu Xefia sira ne’ebé uza nafatin karreta Estadu ba uma, kontra Rezolusaun Governu númeru 130/2021 de 29 de Setembru kona-bá Gestao e Realocação de Veicolos do Estado no uza patrimóniu Estadu. Nune’e mós Funsionáriu Públiku asume kargu xefia uza karreta Estadu la tuir oras no loron servisu nian sei hetan kondenasaun ho Lei Medidas Prevensaun no Kombate Korrupsaun (MPCC) artigu 83 no Kídigu Penál artigu 296 – Pekulatu de Uzu.

Lee Mós: SEKOMS “Hatama” Funsionáriu Kazuál 109

Jornalista: Rogério Pereira Cárceres