Hatutan.com, (06 Juñu 2024), Díli–Governu liu husi Vise-Primeiru-Ministru no Ministru Koordenadór asuntu Ekonómiku, Ministru Turizmu no Ambiente, Francisco Kalbuadi Lay, Kinta (06/06/2024), lidera enkontru interministeriál hodi diskute kona-bá servisu kada ministériu bá  adezaun membru Organizasaun Mundiál Komérsiu (OMK). 

Lee Mós: Governu Aprova Projetu Proposta Rezolusaun Ratifikasaun Protokolu Adezaun TL bá OMK

Vise-Primeiru-Ministru no Ministru Koordenadór asuntu Ekonómiku, Ministru Turizmu no Ambiente, Francisco Kalbuadi Lay, lidera enkontru interministeriál hodi diskute kona-bá servisu kada ministériu bá adezaun membru OMK, Kinta (06/06/2024). Foto/Elio dos Santos da Costa

Vise-Primeiru-Ministru, Francisco Kalbuadi Lay, esplika reuniaun ne’e atu haree ministériu idak-idak nia servisu hodi prienxe rekizitu bá  adezaun OMK liga mós Parlamentu Nasionál ne’ebé ratifika ona adezaun plenu TL nian bá OMK.

Iha biban ne’e Ministru Komérsiu no  Indústria Filipus Nino Pereira hateten iha prosesu pos adezaun, tanba ne’e husi komisaun interministeriál bá adezaun OMK, liu-liu tékniku sira ne’ebé mak durante ne’e halo hela akompañamentu, atu hare fali kada ministériu nia preparasaun ba dekretu-lei, presiza kompleta rekizitu balun ba pos adezaun OMK hamutuk 31 bá plenu adezaun lejizlasaun nian.

Lei kódigu ba propriedade industrial,  ida kona-ba regra orijen nian, lei implementasaun planu asaun ba indústria manufatura, ne’ebé ida ne’e MCI nia sei servisu.

Iha mós lei balun, ne’ebé presiza iha koordenasaun iha liña ministeriál sira seluk, tanba ne’e liu husi enkontru ida ne’e atu fahe informasaun, fahe mós servisu ne’ebé kada liña ministerial sira tenke halo kompleta  planu asaun ba lejizlasaun nian.

Sorumutuk koordenasaun ne’e partisipa mós husi Ministru Petróleu Minerál, Francisco da Costa Monteiro, Ministru Agrikultura, Pekuária no Floresta,  Marcos da Cruz, Sekretáriu Estadu Peska  Domingos da Conceição do Santos,  Vise-Ministru Asuntu Parlamentár,  Adérito Hugo da Costa, Vise-Ministru Justisa bá asuntu Fortalesimentu Institusionál,  Paul Manuel dos Remédios, Vise-Ministru Saúde ba operasionalizasaun  ospitál Flavio   Brandão Mendes de Araújo, Ministru Komérsiu Indústria, Nino Pareira,  Governador Banco Central Timor-Leste Helder Lopes, Ministru Transporte no  Telekomunikasaun (MTK) Minguel Marques Gonçalves Manetelu.

Jornalista : Leopoldina de Carvalho