Hatutan.com, (10 Juñu 2024), Díli—Bankada Parlamentár PLP (Partidu Libertasaun Popular) liuhusi sira-nia deklarasaun polítika iha sesaun plenária Parlamentu Nasionál, Segunda (10/06/2024), hato’o sira-nia lamentasaun no triste ho situasaun laiha kombustivel bá karreta ambulánsia iha Munisípiu Ermera, nune’e obriga pasiente mak atesta ka enxe rasik kombustivel bá karreta ambulánsia hodi transporta pasiente mai Sentru Saúde.

Lee Mós: OJE 2024 bá SNAEM $2.473.928, PN Husu Tenke Aumenta Motorista Ambulánsia

Karreta Ambulánsia. Foto/Dok.Espesiál

Membru PN husi Bankada PLP, Adolfo Martins, haktuir iha plenária PN katak situasaun ne’e akontese iha Suku Hurahou, Munisípiu Ermera, foin lalais, iha ne’ebé inan-feton ida gravida atuba partus liga telefone bá pesoal servisu Ambulansia atu transporta ba Sentru Saúde, maibe motorista ne’e hatan katak la iha kombustivel.

Tanba inan-feton ne’e ho kondisaun  gravida presija tebes asitensia mediku nian, nune’e família pasiente e hasai sira nia osan rasik hodi enxe kombustivel ba ambulansia ne’e bele ba tula inan feton ne’e ba Sentru Saúde.

“Komunidade sira triste ka lakontente tanba kada tinan aprova osan boot, maibé enxe de’it kombustivel ba karreta ambulánsia mós laiha tanba ne’e husu ba Ministériu Saúde atu haree ba situasaun ida-ne’e,”  Deputadu Adolfo Martins hateten.

Dadus ne’ebé Deputadu Adolfo Martins haktuir katak akontesimentu hanesan ne’e ba dala-tolu ona no ida ikus akontese ba profesór ida iha Eskola Sekundáriu Nino Koni Santana, Gleno-Ermera, fulan kotuk, ne’ebé hetan atakasaun fuan bainhira hanorin hela estudante sira, telefone ba ambulánsia atu lori lalais ba Sentru Saúde mas motorista karreta Ambulánsia hatan katak  la iha kombustivel, nune’e obrigadu alunu sira tenke aluga karreta privadu ida hodi tula profesor ne’e ba Sentru Saúde, maibe labele salva profesór Bosco Soares nia vida.

Membru  Bankada PLP ne’e mós levanta kona-bá pasiente ida hosi Munisípiu Ermera ne’ebé baixa iha HNGV fulan ida resin, mas mediku sira fó alta tiha mezmu seidauk rekupera ho razaun dehan la iha ai-moruk no presija hamamuk kama atu fó fali ba pasiente foun ne’ebé tama barak.

Nia mós levanta no prekupa jerador iha Sentru Saúde Ermera avaria no ne’e bele prejudika pasiente sira iha sala emerjénsia uja oksijéniu bainhira eletrisidade mate.

Vise-Ministru Asuntu Parlamentár, Adérito Hugo da Costa iha ámbitu plenária PN promete sei envia asuntu ne’e bá Ministériu Saúde atu buka solusaun bá problema refere.

Jornalista Estajiária:  Isabel Pirres