Connect with us
Pakote Ahi

Internasionál

Xanana Ko’alia Kona-Bá “Define Metas Dezenvolvimentu Foun Perante Mudansa Mundu Nian” iha Fórum Líder Globál

Published

on

Hatutan.com, (14 Juñu 2024), Díli-Primeiru-Ministru (PM), Kay Rala Xanana Gusmão, sai oradór prinsipál hodi ko’alia kona-bá “Define Metas Dezenvolvimentu Foun Perante Mudansa Mundu Nian” iha 60º aniversáriu Konferénsia Nasaun Unidas kona-bá Komérisu no Dezenvolvimentu (UNCTAD): Fórum Líder Globál ne’ebé realiza iha Palais des Nations, Jenébra-Suíça,  Kuarta (12/06/2024).

Lee Mós: Xanana Introdús g7+ bá Estudante Sira iha Melbourne

Xanana sai oradór prinsipál iha 60º aniversáriu Konferénsia Nasaun Unidas kona-bá Komérisu no Dezenvolvimentu (UNCTAD): Fórum Líder Globál ne’ebé realiza iha Palais des Nations, Jenébra-Suíça, Kuarta (12/06/2024). Foto/Mídia GPM

Primeiru-Ministru ko’alia iha fórum ne’e reprezenta Prezidente Repúblika Demokrátika Timor-Leste (RDTL), José Ramos-Horta, ne’ebé hakarak tebes atu partisipa iha fórum ne’e tanba Prezidente Horta nu’udár fundadór ida bá nasaun TL no sempre iha prinsípiu ida nakonu ho sabedoria no disernimentu.

Iha diskursu, Xanana hateten, dezde estebelese iha tinan 1964, Konferénsia ONU nian kona-bá Komérsiu no Dezenvolvimentu sempre iha liña oin hodi luta bá mudansa ekonómia no jeopolítika, luta bá sistema ekonómia ne’ebé justu-liu.

Advertisement

Xefe Governu ne’e konta katak, iha tinan sira dahuluk, UNCTAD dezafia sistema komérsiu globál ho maneira intervensaun merkadu bá matéria prima sira. Iha tinan 1980-mai leten, hamosu resposta ida dominante bá ekonomia neoliberál, Konferénsia ne’e hahú foku bá peskiza, servisu hamutuk no asisténsia tékniku.

Programa sira bá ajustamentu estruturál hosi dékadas tinan 1980 no 1990, konsege deskobre ideolojia nakukun no degradasaun morál hosi Banku Mundiál no mós Fundu Monetáriu Internasionál. Efeitu negativu sira ne’ebé ninia kauza ne’e hamosu hosi programa sira ne’e, sei kontinua eziste iha Sudeste Aziátiku.

“Tanba ne’e maka ida-ne’e importante tebes no UNCTAD presiza tebes posibilidade atu promove pensamentu no ideia independente sira. Importante liu atu subliña katak, análiza hosi UNCTAD ne’ebé identifika ona nível insustentável sira hosi dívida no frazilidade sira estruturál inklui sistema finanseira internasionál antes Krize Finanseira Globál iha tinan 2007,” diskursu PM Xanana Gusmão nian ne’ebé Hatutan.com sita iha komunikadu imprensa.

Foin dadaun, nia dehan, iha resposta internasionál bá Covid-19, UNCTAD ajuda bá asesu vasina no destaka dezafiu ne’ebé nasaun dezenvolvidu sira enfrenta. Oras-ne’e daudaun, mundu enfrenta hela dezafiu foun.

“Ita iha hela mundu ida ne’ebé dala barak mosu konflitu no dezórden, no direitu internasionál ne’ebé aplikadu seletivamente mai hosi nasaun dezenvolvidu sira. Ita iha hela situasaun emerjénsia klimátika ida ne’ebé ninia kauza ne’e mai hosi nasaun industrializadu sira, maibé ninia impaktu boot liu bá iha nasaun dezenvolvidu sira. No ita iha ekonomia globál ida ne’ebé mak sai hanesan abut bá deziguladade extrema,” Xanana hateten.

Advertisement

Tuir Xanana Gusmão, komemorasaun tinan 60 UNCTAD nian, oferese oportunidade osan me’an ida atu bele halo diskusaun kle’an kona-bá mekanizmu aprosimasaun foun sira, oinsá bele enfrenta dezafiu sira ne’e.

“Ida-ne’e signifika hamosu pergunta ida oinsá maka ita bele dezenvolve ekonomia globál inkluzivu no justu. Ita hatene katak, dezenvolvimentu nu’udár prosesu ida ne’ebé difísil-liu no laiha formula únika ida mak bele aplika bá buat hotu-hotu,” Xanana dehan.

Iha tinan 2002, Timor-Leste konsege hamriik hosi okupasaun estranjeira nia ukun durante tinan 24 nia laran no kuaze hela iha kolonializmu-nia ukun durante sékulu lima. Hahú hosi buat mamuk ida, eseptu kanek no trauma tanba funu.

“Ami aprende katak, laiha pás maka sei laiha dezenvolvimentu. No laiha dezenvolvimentu, impossível mós atu iha pás. Ami mós aprende katak, ami la mesak. Iha mós nasaun frázil sira ne’ebé  enfrenta efeitu mai hosi konflitu no difikuldade iha kontestu pás no dezenvolvimentu,” xefe XI Governu RDTL ne’e haktuir.

Nia mós aprezenta iha diskursu katak, iha tinan 2010, nasaun frázil sira halibur-malu atu fahe esperiénsia no forma Organizasaun Internasionál G7+, grupu ida ne’ebé kuaze mai hosi nasaun frázil sira hamutuk 20, atu ko’alia ho lian ida de’it kona-bá dezenvolvimentu, ajudu efikásia no kooperasaun internasionál. Iha tinan 2019, G7+ manán ninia estatutu hanesan observadór iha ONU.

Advertisement

Maski iha ona progresu balun desde independénsia,  maibé Timor-Leste sei sai hanesan nasaun ida hosi nasaun ualu ne’ebé ONU define hanesan nasaun menus dezenvolvidu no Estadu Illa Kiik Dezenvolvidu.

“Ha’u kongratula UNCTAD ho ninia estratejia bá tinan 2024 ne’ebé hakarak apoia Estadu Illa Kiik Dezenvolvidu sira (SIDS). Ida-ne’e mak dokumentu importante ne’ebé oferese kuadru ida bá dezenvolvimentu sustentável, diversifikasaun ekonomia, no dezenvolvimentu rezilénsia. Estratejia UNCTAD nian bá SIDS hatudu dala ida tán katak UNCTAD mak parseiru konfiável-liu bá nasaun dezenvolvidu sira,” Xanana Gusmão konsidera.

Hanesan buat ne’ebé Sekretáriu Jerál ONU, António Guterres hateten ona iha Konferénsia Estadu Illa Ki’ik Dezenvolvidu Sira (SIDS) foin lalais ne’e, “Instituisaun globál sira sei la efetivu-liu bainhira sira la reprezentativu”. Infelizmente, iha TL, instituisaun finanseira internasionál sira sempre oferese lisaun ho lais-liu, maibé sempre lentu iha fornesimentu emprégu.

“Ikus-mai sira hela ho pergunta katak, tanba saida mak sira la kompriende ami-nia prioridade, ami-nia kontestu, no ami-nia kultura. Ita hatene katak, dezenvolvimentu ne’e bele sussesu bainhira dezenvolvimentu ne’e halo no lidera hosi nasaun ne’e rasik,” nia dehan.

Iha inísiu tinan ida-ne’e, Timor-Leste integra ona iha Organizasaun Mundiál Komérsiu. Situasaun  ne’e sei ajuda tebes atu integra mós TL bá iha Komérsiu Globál.

Advertisement

Hanesan membru grupu nasaun frázil G7+, TL fiar katak UNCTAD tenke iha ninia rekursu atu apoia duni nasaun frázil sira ne’ebé mak maioria hela iha Áfrika. Nasaun sira ne’e boot no riku bá rekursu naturál, maibé ki’ak loos.

“Ami husu bá ONU no UNCTAD atu esplora abordázen ida di’ak-liu hodi bele fornese apoiu no asisténsia hanesan dalan ida atu bele loke odamatan pás nian no dezenvolvimentu iha nasaun frázil sira. Importante loos bá UNCTAD atu bele hetan apoiu polítika nessesáriu ne’ebé dezempeña ninia papél no trasa modelu foun dezenvolvimentu internasionál,” Xanana husu.

Timor-Leste dezeza bá UNCTAD atu sai di’ak liu-tán iha futuru. Ema hotu-hotu iha espersansa atu bele servisu hamutuk hodi harii moris ida ne’ebé di’ak-liu bá ema hotu-hotu iha mundu tomak.

Partisipa iha konferénsia ne’e, Sekretáriu-Jerál Nasaun Unidas, António Guterres, Sekretária-Jerál Konferénsia Nasaun Unidas kona-bá Komérsiu no Dezenvolvimentu (UNCTAD), Rebeca Grynspan, Xefe Estadu no Xefe Governu sira mai hosi nasaun oioin hosi mundu.

 Jornalista: Rogério Pereira Cárceres

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Internasionál

Ramos-Horta Felisita Primeiru-Ministru Reinu Unidu Keir Starmer

Published

on

Hatutan.com, (16 Jullu 2024), Díli—Prezidente Repúblika (PR), José Ramos-Horta felisita no hato’o parabéns bá Primeiru-Ministru eleitu Reinu Unidu, Keir Starmer.

(more…)

Kontinua Le'e

Internasionál

MNEK ho Sekretáriu Ezekutivu CPLP Diskute Preparasaun bá Reuniaun Konsellu Ministru CPLP

Published

on

Hatutan.com, (13 Jullu 2024), Díli- Ministru Negósiu Estranjeiru no Kooperasaun (MNEK), Bendito dos Santos Freitas, Sesta (12/07/2024), hala’o enkontru kortezia ida ho Sekretáriu Ezekutivu Comunidos dos Países da Língua Portuguesa (CPLP), Zacarias Albano da Costa, hodi ko’alia kona-bá preparasaun ba enkontru anuál Konsellu Ministru CPLP ne’ebé sei hala’o iha loron 19 fulan-Jullu, tinan ne’e, iha São Tomé e Principe.

(more…)

Kontinua Le'e

Internasionál

Keuskupan Atambua Mengimbau Peserta Kunjungan Paus Fransiskus di Dili Patuhi 8 Syarat Ini

Published

on

Hatutan.com, (12 Juli 2024), Dili—Keuskupan Atambua secara resmi telah membuka pendaftaran peserta kunjungan Paus Fransikus di Dili-Timor Leste yang dijadwalkan pada 09-11 September 2024. 

(more…)

Kontinua Le'e
Advertisement

Trending