Hatutan.com, (07 Juñu 2024), Díli—Governu Portugés liu hosi ninia Ministra Justisa, Rita Alarcão Júdice hakarak atu fó apoiu bá Governu Timor-Leste (TL) liuliu iha área reforma seitór justisa.

Primeiru-Ministru (PM), Kay Rala Xanana Gusmão simu vizita hosi Ministra Justisa Portugal, Rita Alarcão Júdice, iha sesta (07/06/2024), iha Gabinéte Fronteira Marítima no Terreste iha Palásiu Governu, Dili. Foto: Elio dos Santos da Costa.

Apoiu ne’e diskute ona entre Primeiru-Ministru (PM), Kay Rala Xanana Gusmão ho Ministra Justisa Portugal, Rita Alarcão Júdice, iha sesta (07/06/2024), iha Gabinéte Fronteira Marítima no Terreste iha Palásiu Governu, Dili.

Lee Mós: Alterasaun Lei Migrasaun Portugal La’ós Tanba Violénsia Entre Timoroan iha Fátima

Primeiru-Ministru Xanana Gusmão dehan, foin bá dala-uluk TL simu membru Governu hosi Portugal, tanba nia mós foin mak eleita iha tinan 2024.

Xanana konsidera vizita Ministra Justisa Portugal ne’e atu hatudu katak, Portugal iha Timor, no Timor iha sira nia fuan, hodi iha saida de’it mak TL presiza karik, hakarak kooperasaun sei mai nafatin.

“Ami ko’alia liu kona-bá reforma justisa. La konsege asina akordu ruma tanba Ministru Jusitisa TL sei bá to’o fali iha ne’ebá, atu sira haree didi’ak dokumentus, buat sira ne’e hotu. Tanba iha akordu ne’e, iha ita nia planu bá reforma justisa, ita iha dimensaun rua,” Xefe Governu Xanana Gusmão, informa.

Xanana esplika, iha dimensaun rua hosi planu bá reforma setór justisa ne’e, ida maka médiu no longu prazu. Ho ida ne’e, ida seluk joven sira bá estuda direitu iha Portugal, tanba tékniku sira ministériu justisa nian mós hala’o tiha ona teste bá Timoroan sira atu hili sira atu bá.

Ida seluk maka, kurtu prazu ninian ne’e, hodi fó ajuda liu-liu bá Juizes, prokuradóres, defensóres públikus, advogadu sira, ne’e iha metodolojia ida sira bele halo ho lisaun ne’ebé di’ak liu, bele ajuda sira hodi kompriende no Juizes ka prokuradór sira ne’ebé mai hosi Portugal, la’os mai atu servisu.

“Tanba dala-ruma sira hakerek-hakerek, ita nian sira nein kompriende saida mak hakerek iha ne’ebá, Xina de’it. Mais mai par fó apoiu, hodi ita nian saida mak bele hasai hosi ulun, hanoin didi’ak, hakerek, hodi nune’e ita hadi’a tiha justisa ne’ebé ita hotu-hotu temi baibain dehan katak, justisa susar atu mate, la halo justisa ne’ebé loos. Ne’e-duni, bemvinda bá señora ministra,” Xanana Gusmão hateten tán.

Ministra Justisa Portugal, Rita Alarcão Júdice, agradese bá Primeiru-Ministru Xanana Gusmão, bá iha sesaun ida ohin, sira bele hasoru malu, no konsidera hanesan onra boot ida ne’ebé nia hetan iha Timor.

Ministra justisa Portugal ne’e sente onradu liután, tanba vizita ida ne’e mós monu kedan ho selebrasaun Luís Camões nia aniversáriu bá dala-500, hahú hosi loron 5 fulan-maiu, Loron Mundial Lian Portuges nian, to’o loron 10 fulan-juñu, Portugal, Camões no Komunidade Portuges sira, no to’o loron 25 fulan-junu tinan ne’e.

Jornalista: Rogério Pereira Cárceres