Hatutan.com, (18 Juñu 2024), Díli- Governu Unidade Nasionál (GUN) agradese Prezidente Repúblika, José Ramos-Horta nia advokasia bá solusiona konflitu iha Myanmar.

Lee Mós: Ramos-Horta Halo Diálogu ho Futuru Lider ASEAN Ko’alia Valór Demokrásia no Rezolusaun Konflitu Myanmar

Governu Unidade Nasionál (GUN) agradese Prezidente Repúblika, José Ramos-Horta nia advokasia bá solusiona konflitu iha Myanmar. Foto/Elio dos Santos da Costa

“Ida-ne’e di’ak tebes, mai fali iha ne’e atu haree fila fali kona-bá vizita antes ne’e hodi relata kona-bá situasaun sira iha Myanmar, atu hare hamutuk saida mak halo ona no saida mak presiza atu halo tuir mai. Hahú agora ba oin, iha tempu hanesan, oinsá mak bele hahú relasaun entre Timor-Leste no Myanmar liu-liu ho Governu Unidade Nasional no povu, tan ne’e ho laran-manas tebes hasoru malu ho Prezidente Ramos-Horta, ho apoiu maka’as hanesan ne’e no ami mós hakarak agradese bá Prezidente Ramos-Horta tanba advokasia makas hodi buka solusaun bá povu Myanmar nia revolusaun,” Ministra Estranjeira GUN Myanmar Zin Mar Aung, bá jornalista sira iha Palásiu Prezidensiál hafoin  enkontru ho Prezidente Repúblika José Ramos-Horta, Tersa (18/06/2024).

Nia hatutan situasaun atuál iha Myamar kompara ho tinan hirak bá kotuk, iha área balun kontroladu no GUN presiza mós fó asisténsia umanitária bá servisu públiku, nu’udár Governu responsavel iha área sira ne’ebé kontroladu.

Ida-ne’e akontese duni iha rai la’ós de’it hodi luta hasoru junta militár ida, maibé iha tempu hanesan GUN servisu hela iha edifísiu Estadu sira no iha mudansa sistema sira bá futuru. Maibé, iha área kontrolu nian, GUN bele fornese servisu públiku ho asistente oin-oin bá nafatin, hodi koko atu normaliza hanesan moris loroloron nian.

“Dezafiu úniku sira bá governu unidade nasionál no bá povu mak atake no diskriminasaun husi militár sira,” Zin Mar Aung hateten.

Ministra Estranjeira GUN Myanmar ne’e mós subliña liután katak husu atu halo estensaun ba sansaun ekonómika ne’ebé mak sei presiza nu’udár presaun diplomátika, atu bele solusiona konflitu iha Myanmar.

Hasae Kooperasaun iha Área Saúde no Edukasaun

Iha biban ne’e, Ministériu Saúde no Edukasaun Governu Unidade Nasional, Zaw Wai Soe hateten obrigadu ba oportunidade, ida-ne’e onra ida atu tama iha Palásiu Prezidensiál Timor-Leste no ida-ne’e mós hanesan oportunidade bá Governu Unidade Nasionál atu diskute kona-bá saúde no edukasaun, iha fatin ne’ebé livre no tuir mai, hodi fó servisu ba povu no buat ne’ebé hanesan mós iha oportunidade ida atu apoiu povu.

“Ha’u hanoin katak ami buka hela kolaborasaun entre nasaun rua ne’e iha area Saúde no edukasaun hodi apoiu dezenvolvimentu iha país ne’e,” Zaw Wai Soe hateten.

Jornalista: Vito Salvadór