Hatutan.com, (24 Juñu 2024), Díli– Parlamentu Nasionál, Segunda (24/06/2024), konsegé realiza eleisaun bá kandidatu komisáriu Komisaun Anti-Korrupsaun (CAC, sigla portugés) periodu 2024-2028 ho aprezenta kandidatu úniku  Rui Pereira.

Lee Mós: Kandidatu Komisáriu CAC Rui Pereira La’ós Personalidade Independente

Kandidatu úniku Komisáriu CAC, Rui Pereira. Foto/Tome da Silva

Eleisaun ne’ebé hala’o ho membru parlamentu prezente na’in-45 ne’e rezulta votu afavór 41, kontra  haat (4) husi membru Bankada PLP no Bankada FRETILIN rasik hili walk out.

“Rezultadu votasaun ne’ebé foin hala’o Afavór 41, kontra 4  totál votu 45, ne’ebé legál no ita nia votasaun bá kandidatu ne’e pasa,” Prezidente Parlamentu Nasionál Maria Fernanda Lay ideklara iha plenária PN kona-bá eleisaun  komisáriu CAC nian.

Iha eleisaun ne’e deputadu na’in-20 mak falta ka la partisipa, kompostu husi na’in-19 husi Bankada FRETILIN ne’ebé walk out iha prosesu eleisaun, no deputada Irene Gonjaga falta. Nune’e eleisaun refére partisa husi Bankada CNRT nia membru 31, Bankada PD nia membru prezente na’in-neen (6) , Bankada KHUNTO ho membru na’in-lima (5) no Bankada PLP  nian membru na’in-haat (4) vota kontra.

Liuhusi komunikadu imprensa ne’ebé fó sai husi Bankada FRETILIN klarifika katák, ohin plenária Segunda-feira loron 24 Juñu tinan 2024, iha periodu orden do dia, Parlamementu Nasionál halo eleisaun bá Komisáriu Komisaun Anti-Korrupsaun (CAC) ho kandidatu úniku Rui Pereira ne’ebé atuálmente Prezidente Komisaun Nasionál Juridisaun Partidu CNRT.

“Bankada FRETILIN konsidera katák, eleisaun bá Komisáriu CAC  importante tebes  atu bele kumpri kumprimísiu Estadu nian bá luta kontra korrupsaun, maibé Bankada FRETILIN deside la partisipa iha eleisaun tanba  kandidatu ne’ebé Governu propoin la priense rekejitu legál tuir lei CAC, artigu 8 pontu 2 katák, “Kadidatu komisáriu KAK tenke rekuñesidu ninia independénsia no imparsialidade ne’ebé ho nivél aas,” sita komunikadu Bankada FRETILIN nian.

Artigu 11. (g) Lei no.1/2024 de 8 de Maiu  kona-bá alterasaun daruak bá lei CAC hafraku funsaun Komisáriu CAC tanba bele hetan ezonerasaun hosi Parlamentu Nasionál bainhira nia promove investigasaun ruma hasoru membru Governu ka lideransa partidu sira ne’ebé hola parte iha  maiória Parlamentar ka iha Governu.

“Argumentu ida ne’e mak desde iha kedas inisiu halo Bankada FRETILIN kontra idea husi CNRT ne’ebé elemina rekezitu minimu iha lei anteriór hodi kontra natureza CAC nian hanesan polisia kriminál ida atu halo investigasaun ba krimi korrupsaun,” Bankada FRETILIN klarifika.

Jornalista Estajiária : Zita Menezes