Hatutan.com, (27 Juñu 2024), Díli-Primeiru-Ministru (PM), Kay Rala Xanana Gusmão, hateten tinan ida-ne’e IX Governu Konstitusionál nia ezekusaun ba orsamentu no programa sira sei fraku tanba sei hein rezultadu auditoria internasionál.

Lee Mós: Ezekusaun OJE 2024 Foin Atinje 30,8%

Primeiru-Ministru, Xanana Gusmão. Foto/Elio dos Santos da Costa

“Ha’u dehan tiha ona katak tinan ida-ne’e ami ladún ezekuta buat ruma ka buat barak tanba ba buka atu haree auditoria internasionál hodi haree sala barak ne’ebé kona-bá osan,” hateten Primeiru-Ministru Kay Rala Xanana Gusmão ba jornalista sira iha Palásiu Prezidensiál, Kinta (27/06/2024).

Xefe Governu hatutan ukun an ne’e povu mak sosa ho ran no isin, ho sakrifisiu no mate, Timor iha direitu ba fundu petróleu, osan ne’e povu nian, jere ho di’ak tanba ne’e halo karik auditoria ho Timoroan sira bele temi karik dehan ne’e partidu nian mais lae,  bolu auditoria internasionál mai atu haree, no sei foti buat sira ne’e hotu, laiha ida atu dehan laiha ida ne’ebé atu dehan ne’e laiha onra.

Xanana dehan Sesta bázika nia dokumentu sunu tiha, hanoin katak ne’e furak loos ka. Imi sei lembra hudi sira lori mai kamioneta boot bainhira fahe at, no dodok hotu ona tanba todan no buat folin $1.00 karik aumenta ba $10.00 mas tanba buat sira ne’e hotu sunu tiha.

Fundu Covid-19 no orsamentu ba PNDS 2022 millaun $68 gasta millaun $38 no ba buka iha ne’ebé la hetan, no millaun $30 seluk envés fila ba kofre estadu maibé iha hela konta bankária suku nian.

Merenda eskolár agora mak foin hakilar uluk laiha sei toba, iha fatin balun labarik sira la hetan merenda eskolár osan rai hela de’it iha ne’ebá tanba laiha responsabilidade no kontabilidade atu tinan-tinan relata ba saida mak halo no osan rai-rai to’o barak tiha hodi osan ne’e sosa tiha karreta.

“Ita ladún malu, la persege malu, ita hakarak katak osan povu nian jere ho di’ak atu dezenvolve rai ida ne’e,” Xanana Gusmão subliña.

Xefe governu dehan Kona-ba estrada sira iha área rurál ne’e iha IX Governu Konstitusionál nia programa haree ona ba buat sira ne’e hotu.

Jornalista: Vito Salvadór