Hatutan.com, (07 Jullu 2024), Díli- Prezidente Repúblika (PR), José Ramos-Horta, simu Prémiu “Chave da Cidade” husi Konsellu Munisipál sidade Maputo, Moçambique.

Lee Mós: Mozambique husu Timor-Leste Fahe Esperiénsia Jestaun Fundu Petrolíferu

Prezidente Repúblika (PR), José Ramos-Horta, simu Prémiu “Chave da Cidade” husi Konsellu Munisipál sidade Maputo, Moçambique. Foto/Mídia GPR

Prémiu   “Chave da Cidade” ne’e nu’udár rekoñesimentu ba Prezidente Repúblika, José Ramos-Horta nia realizasaun polítiku no akadémiku ne’ebé signifikativu, nune’e mós ho nia estatutu nu’udár laureadu Nobel ba Pás nian.

Komunikadu ba Imprensa ne’ebé Hatutan.com asesu husi Gabinete Média Palásiu Prezidensiál, Domingu (07/07/2024), relata serimónia entrega Prémiu ne’e hala’o iha Asembleia Munisipál no Prezidente Konsellu Munisipál Maputo, Razaque Manhique, aprezenta pesoalmente “Chave da Cidade” áa Prezidente Repúblika José Ramos-Horta.

“Prémiu ne’e fó bazeia bá rezolusaun ida ne’ebé aprova hosi Asembleia Munisipál Maputo, hodi rekoñese Prezidente Repúblika José Ramos-Horta nia servisu no realizasaun sira durante nia moris tomak,” Hatutan.com sita komunikadu.

Prémiu “Chave da Cidade” hametin liután kooperasaun no ligasaun entre Moçambique no Timor-Leste, nasaun rua ne’ebé ko’alia lian portugés ho istória luta ba independénsia no esforsu konstrusaun nasaun nian ne’ebé iha.

Ramos-Horta foto hamutuk ho membru Konsellu Munisipál Maputo, Moçambique. Foto/Mídia GPR

Bainhira simu prémiu ne’e, Prezidente Repúblika José Ramos-Horta hato’o nia agradesimentu no reafirma nia kompromisu hodi haburas dame no kooperasaun entre nasaun rua ne’e.

José Ramos-Horta, oras ne’e hala’o nia mandatu daruak nu’udar Prezidente Timor-Leste, hetan respeitu barak tanba nia abilidade diplomátika no serbisu la kole iha rezolusaun konflitu.

Prezidente Repúblika José Ramos-Horta hamutuk ho Bispu Emeritus Dom Carlos Filipe Ximenes Belo, SDB simu prémiu Nobel da Pás iha tinan 1996 tanba sira-nia esforsu atu hetan solusaun Pasífiku ba konflitu iha Timor Lorosa’e.

Jornalista: Vito Salvadór