Hatutan.com, (10 Jullu 2024), Díli- Ministru Negósiu Estranjeiru (MNE) Ukránia lori xefe misaun diplomátika estranjeiru husi nasaun  33 bá vizita fatin atake husi Rusia iha Okhmatdyt.

Lee Mós: Zelenskyy Agradese Povu Timor-Leste Apoiu Soberania no Integridade Territoriál Ukránia

Kondisaun ospitál Ukránia nian ne’ebé hetan atake husi rudal Rusia. Foto/Espesiál

Sita husi pajina ofisiál MNE Ukráina ne’ebé Hatutan.com asesu, Kuarta (10/07/2024), informa iha loron 08 fulan-Jullu 2024 iha komisaun husi Ministru Negósiu Estranjeiru Ukránia Dmytro Kuleba, Vise-Ministru Yevhen Perebyinis, hamutuk ho xefe misaun diplomátika 33 ne’ebé hetan akreditasaun iha nasaun Ukránia, vizita ospitál boot ida iha Ukránia, Okhmatdyt, ne’ebé hetan estragu maka’as husi rudal Rusia nian.

Delegasaun Embaixadór Estranjeiru sira iha oportunidade atu haree konsekuénsia husi estragu sira ne’ebé kauza husi atake rudal Rusia nian  bá fasilidade médiku ida-ne’ebé sai hanesan fatin ema sivíl sira, inklui labarik sira, hetan tratamentu bá kankru no moras todan sira seluk.

“Husu bá reprezentante sira husi misaun diplomátika no organizasaun internasionál sira atu hatán ho determinasaun bá krime funu ne’ebé aat ne’e no haka’as aan atu hametin defeza aero iha rai-Ukránia.”  Yevhen Perebyinis hateten.

Ministru Asuntu Internu (Ministru Interior), Ihor Klymenko no Diretór Okhmatdyt Volodymyr Zhovnir marka prezensa iha fatin ne’e hodi fó-hatene bá diplomata estranjeiru sira kona-bá konsekuénsia husi terrorista Rusia nian.

 Delegasaun ne’e inklui xefe no reprezentante sira husi misaun diplomátika sira husi Uniaun Europeia, NATO, ACNUR, PNUD, UNICEF, Argentina, Arménia, Azerbaijão, Áustria, Canadá, França, Grécia, Índia, Indonézia, Japaun, Itália, México, Moldávia, Montenegro, Países Baixos, Noruega, Macedónia do Norte, Polónia, Santa Sé, Eslováquia, Eslovénia, Espanha, Sudão, Suécia, Suíça, Turquia, Vietname ho  Reinu Unidu.

Jornalista: Vito Salvadór