Hatutan.com, (11 Jullu 2024), Díli- Timor-Leste ho Angola iha ona planu forma komisaun espesializada ida ne’ebé bele tulun nasaun rua hodi trata kooperasaun sira ne’ebé nasaun rua asina ona.

Lee Mós: TL-Angola Asina Akordu Vistu Livre bá Passaporte Servisu-Diplomátiku

Ministru Negósiu Estranjeiru no Kooperasaun (MNEK) Timor-Leste, Bendito dos Santos Freitas ho Ministru Relasaun Externa Repúblika Angola, Téte António asina nota entendimentu. Foto/Média MNEK

Komunikadu Imprensa ne’ebé Hatutan.com asesu husi Gabinete Média MNEK, Kinta (11/07/2024), informa Ministru Negósiu Estranjeiru no Kooperasaun (MNEK) Timor-Leste, Bendito dos Santos Freitas, hala’o enkontru bilateral ho nia omólogu Ministru Relasaun Externa Repúblika Angola, Téte António, hodi aborda futuru kooperasaun iha setór importante sira no mós fó segmentu bá akordu tolu ne’ebé asina ona.

 Durante iha diskusaun, parte rua konkorda atu Governu Timor-Leste ho Angola forma komisaun mista ka “joint commission” ida-ne’ebé sei envolve ekipa téknika liñas husi ministeriais hodi halo diskusaun ba assuntu sira hanesan petróleu, turízmu, arikultura, kapasitasaun rekursu umanus no seluk tan.

“Komisaun mista ne’e ekipa tékniku ne’ebé ligadu ba assuntus ministeriais hanesan petróleu liu-liu ba gás, ba kapasitasaun rekursu umanus, arikultura, setór turízmu sira-ne’ebé importante ne’e ekipa téknika sei deside atu halo nia planu kalendarizasaun, atu nune’e Timor-Leste ho Angola liu husi komisaun mista atu bele deside,” hateten MNEK Bendito Freitas, iha komunikadu ne’ebé Hatutan.com sita.

Xefe Diplomasia ne’e hatutan, vizita Xefe Estadu, José Ramos-Horta nian ba nasaun rua Mozambique ho Angola ne’e hanesan aktu ida atu reabertura no hametin fila-fali Timor-Leste nia relasaun ho nasaun rua ne’e.

“Prinsipalmente ho Angola ita haree ba sira-nia dezenvolvimentu ne’ebé modernu bele sai mós hanesan instrumentu referénsia ba ita-nia tékniku Timoroan sira mai iha ne’e liu husi komisaun mista atu bele hala’o servisu didi’ak ba promove dezenvolvimentu ba bem-star ba ita-nia paíz rua ne’e no povu rua ne’e,” katak Ministru Bendito.

Iha akordu tolu ne’ebé Ministru Bendito Freitas asina ho nia omólogu Ministru Relasaun Exteriór Angola, Téte António, iha loron 8 fulan jullu foin lalais ne’e kona-ba Konsulta Polítika Diplomátika, akordu kooperasaun entre Akademia Diplomátika “Venâncio de Moura” Angola ho Centro Estudo Diplomátika Timor-Leste nian, no mós memorandu entendimentu kona-ba izensaun vistu ba titulares passaporte servisu ho diplomátika entre nasaun rua.

Jornalista: Vito Salvadór