Hatutan.com, (23 Jullu 2024), Díli- Ministru Justisa (MJ), Sérgio de Jesus Fernandes da Costa Hornai, informa kazu Fujitivu Kalumban Mali iha ona Ministériu Públiku nia liman no Prokuradoria-Jerál Repúblika (PGR) sei uza kompeténsia tomak atu haree no lori prosesu ne’e ba oin.

Lee Mós: Fujitivu Kazu Korrupsaun Kalumban Mali Dupla Sidadania

Autoridade PCIC halo hela investigasuan ba Kalumban Mali ne’ebé deskunfia falsifika dokumentu hodi troka nia identidade bá Timor ho naran Leonardo Benigno Tilman. Kuarta (05/07/2023). Foto/Dok.PCIC.

Kalumban Mali, fujitivu Prokuradoria Repúblika Indonézia nian ne’ebé envolve iha kazu korrupsaun no deskonfia halai mai subar iha Timor-Leste hodi troka nia identidade ho naran Leonardo Benigno Tilman no deskonfia mós falsifika dokumentu hodi hetan nasionalidade Timorense.

Kalumban Mali, hetan kondensaun husi Tribunal Nusa Tengara Timur (NTT)-Indonézia ho kazu aktu kriminál sira korrupsaun nian liga ho projetu fornesimentu adubu iha Servisu Agrikultura NTT nian no sai hanesan fujitivu dezde tinan 2016.

“Ha’u hakarak hateten de’it prosesu hotu-hotu kuandu tama iha ita-nia área jurisdisaun, PGR hanesan autoridade sentral nia sei uza nia aparellu no kompeténsia hotu para atu haree. Tantu iha servisu nasionál Intelijénsia, servisu nasionál órgaun polísia kriminál nia sei hola medida hotu-hotu, ha’u hanoin PGR iha kbi’it,” Ministru  Sérgio de Jesus Fernandes da Costa Hornai ba jornalista sira iha Palásiu Prezidensiál, Tersa (23/07/2024).

Governante ne’e subliña liután katak Ministériu Públiku hala’o hela nia servisu no PGR nu’udár autoridade sentral sei haree kazu sira-ne’e ho matenek no profisionál hodi bele fó solusaun.

MJ no MP Tenke iha Koordenasaun

Iha hasoru malu entre PGR, Alfonso Lopes, Ministru Sergio Hornai ho Prezidente Repúblika (PR), José Ramos-Horta husu ba Ministériu Justisa no Ministériu Públiku (MP), liu husi Prokurador-Jeral Repúblika (PGR) inklui instituisaun Justisa sira seluk atu iha koordenasaun d’iak hodi hametin liután setór justisa iha Timor-Leste.

Ministru Justisa (MJ), Sérgio de Jesus Fernandes da Costa Hornai haktuir Prezidente Repúblika José Ramos Horta tau situasaun sira ei-njerál atu oinsá mak iha koordenasaun ida metin, haree sasán sira iha justisa formál, justisa sosiál no i mós tenke pondera haree situasaun jerál atu bele enfrenta no fó solusaun ba problema sira ne’e.

“Tanba hanesan estadu ita liga ho sosiedade tantu iha rai-laran no iha rai-li’ur no mós aspetu sira seluk ne’ebé interkonetividade. Purtantu ita ko’alia ida ne’e ho kle’an, informa ida ne’e purmenore no fó hatene ba Xefe Estadu no Xefe Estadu orienta mós ami liuliu ha’u hanesan ezekutivu no PGR atu haree sasán sira ne’e ba oin ho di’ak.” Sérgio de Jesus Fernandes da Costa Hornai hateten.

Nia afirma mós katak iha enkontru ne’e konserteza koalia kona-áa justisa no situasaun ne’ebé iha relasionamentu iha polítika setór justisa estadu nian no ninia relasaun sira bilaterál no multi-lateral, Timor-Leste atu ba ASEAN no atu sai mós hanesan membru permanente OMK ninian, iha problema barak ne’ebé mosu, oinsá mak  bele haree situasaun sira ne’e ho kbi’it, iha kapasidade, iha koordenasaun institusionál Estadu nian.

Jornalista: Vito Salvadór