Hatutan.com, (24 Jullu 2024), Díli—Eis Prezidente Repúblika, Jenerál reformadu Taur Matan Ruak informa bá Prezidente Repúblika (PR), José Ramos-Horta kona-bá asidente tráfiku iha Atambua provínsia Nusa Tenggara Timur (NTT), Indonézia hafoin fila hosi Rejiaun Administrativa Espesiál Oe-cusse-Ambeno (RAEOA), iha loron 22 fulan-jullu taka ona.

Eis Prezidente Repúblika, Jenerál reformadu Taur Matan Ruak hasoru-malu ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru- Pité, kuarta (24/07/2024). Foto:Elio dos Santos da Costa.

Taur Matan Ruak informa ona asuntu ne’e bá Xefe Estadu iha Palásiu Prezidensiál Nicolau Lobato Bairru- Pité, kuarta (24/07/2024).

Lee Mós: Taur Matan Ruak Prontu Kolabora ho Auditoria Ne’ebé Xanana Inisia

“Ohin ho Xefe Estadu ko’alia assuntu sira kona-bá situasaun rai laran no mós asuntu sira seluk. Aproveita situasaun ida-ne’e hodi informa mós bá Prezidente Repúblika kona-bá asidente ne’ebé hetan iha Atambua-NTT,” Taur Matan Ruak hateten.

Jenerál reformadu ne’e dehan, asidente ne’ebé hetan iha loos viziñu sira nia área tanba ne’e Taur informa bá Prezidente Repúblika katak, asidente ne’e la planeadu no parte TNI mós la planeia atu akontese maibé derrepente de’it xoke.

“Entaun, ha’u husu atu taka kazu ne’e. Husu mós atu labele kastigu soldadu ne’ebé lori kareta xoke ha’u nia kareta. Ida tán maka husu atu sira mós respeita regra tránzitu nian,” Taur Matan Ruak hateten.

Eis Primeiru-Ministru ne’e informa mós katak prosesu asidente ne’e taka ona, maibé prosesu interna TNI nian la hatene, no importante maka perdua ona sira no husu taka kazu ne’e.

Prezidente Repúblika José Ramos-Horta hateten katak, ho hahalok murak ne’ebé eis Prezidente Repúblika hatudu ida-ne’e sentidu mak Estadu no parte TNI nian atu taka ka la’e ne’e sira nia kestaun tanba disiplina militár iha Indonézia rigorozu duni.

Tuir kronolojia ne’ebé Hatutan.com asesu hosi pájina ofisiál eis Primeiru-Ministru Taur Matan Ruak, haktuir, Taur Matan Ruak iha segunda (22/07/2024) hetan asidente viasaun kiik ida iha área Atambua-Indonézia nian, bainhira ho ekipa iha dalan atu fila hikas mai Dili via Terrestre hosi Oe-Cusse.

Asidente xoke ne’e akontese kuaze tuku 10 liu oras Indonézia (WITA), iha área Suskoe, Atambua, involve  hosi  karreta  militar Indonézia (TNI) nian ho marka Isuzu hosi Yonif Raider 744/SYB, soke iha parte liman loos besik motorista tur bá.

Iha akontesimentu ne’e, eis Prezidente Taur Matan Ruak ho nia kondutór no muska iha kondisaun di’ak no la hetan kanek ruma, maibé karreta mak  nakbetok oitoan besik parte kondutór  tur bá.

Hafoin asidente, responsável TNI hosi Yonif Raider 744,  Polísia Tranzitu Atambua, Konsular-TL mai hamutuk rezolve iha Konsuladu Timor-Leste nian iha Atambua.

Iha prosesu rezolve ne’e, parte responsavel TNI nian hosi Yonif Raider 744 husu deskulpa bá Eis Prezidente Taur Matan Ruak bá asidente ne’ebé la espera no prontu responsabiliza bá nia membru nia neglijénsia.

Iha sorin seluk, eis Prezidente  Repúblika Taur Matan Ruak fó perdaun bá motorista ne’e no husu bá parte Komandu TNI Yonif Raider atu taka kazu ne’e.

Husu mós atu lalika kastigu nia membru ne’e, maibé husu  atu hadi’ak de’it mak karreta Honda Livina ne’ebé mós hetan xoke hamutuk iha asidente ne’e.

Hafoin rezolve, eis Prezidente Repúblika ho komitiva kontinua viajen mai Dili.

Jornalista: Vito Salvadór