Hatutan.com, (04 Setembru 2024), Díli-Governu liuhosi somurutu ordináriu Konsellu Ministru sira-nian, Kuarta  (04/09/2024), aprova ona projetu Dekretu- Lei Kurríkulu Báziku Nasionál ba Terseiru Siklu Ensinu Báziku nian, ne’ebé abranje husi tinan eskolaridade 7.º, 8.º e 9.º nian, ne’ebé aprezenta hosi Ministra Edukasaun, Dulce de Jesus Soares.

Nota komunikadu ne’ebé Hatutan.com sita mensiona  kurríkulu ida-ne’e substitui versaun tinan 2011 nian, ho objetivu atu unifíka no moderniza ensinu báziku hodi oferese edukasaun ida ho kualidade ne’ebé aliña ho nesesidades kontemporáneas.

Reuniaun Konsellu Ministru.Foto/Dok

Objetivu prinsipál inklui dezenvolvimentu kona-ba koñesimentu sientífiku no linguístiku, aleinde fortalesimentu ba kompeténsias hanesan pensamentu analítiku-krítiku, kriatividade, komunikasaun no valorizasaun ba tradisoins kulturais. Foka-liu introdusaun ba dixiplina “Fraternidade Humana, Morál no Étika”, ne’ebé inspira iha ensinamentu Papa Francisco no Saserdote Musulmanu Al-Azhar nian, ba promosaun pás no konvivénsia armonioza.

Implementasaun hosi kurríkulu ida-ne’e sei promove abordajen inkluziva ida kona-ba diversidade, aleinde introdús elementus inovadores hanesan literasia dijitál no moris-di’ak fíziku no mentál. Eskola sira sei iha autonomia hodi adapta kurríkulu tuir karakterístikas rejionais, naran katak respeita prinsípiu orientadór sira.

Iha intensaun atu alunu sira, bainhira remata siklu ida-ne’e, sira iha ona kapasidade atu partisipa ho ativu iha sosiedade, ho koñesimentus sientífikus avansadus, iha tempu hanesan prezerva tradisoins ne’ebé kria identidade timoroan nian no dezenvolve pensamentu ida krítiku hodi resolve problema no foti desizaun sira ho matenek no responsábilidade.

“Liuhosi enkontru KM, aprova kurríkulu nasionál dbaze bá ensinu báziku terseiru síkulu, la’ós mudansa boot ida iha kurríkulu ne’e, maibé, atu fó de’it kontínuidade bá kurríkulu primeiru no segundu síkulu do ensinu báziku, iha prinsípius orientadóres mak presiza halo mudansa uitoan, no nune’e mós kompleta liután iha nia dezenvolvimentu, iha dezenvolvimentu linguistíku, dezenvolvimentu sosial, nomós iha dezenvolvimentu siénsia Siéxias,” Ministra Edukasaun, Dulce de Jesus Soares hatete bá Jornalista sira hafoin lansamentu lívru ho títulu “Ili Mata” kona-bá Saudozu Komandante Nino Conis Santana nian iha Xanana Gusmão Reading Room (XGRR), Lecidere Dili, Kuarta (04/09/2024).

Ministra Dulce de Jesus dehan, iha dezenvolvimentu sosial nian, iha terseiru síkulu, aumenta tán matéria ida mak importante tebtebes atu hanorin bá estudante sira, atu sai estudante ne’ebé maka hatene, aban-bainrua sira boot mai, sira bele sai sidadaun ida ne’ebé mak bele kria pás, toleránsia, respeitu, liuhosi koñese relijiaun sira seluk ne’ebé mak iha mundu ne’e.

“No bele koñese mós sira-nian aan rasik, bele mós iha respeita bá ema seluk hanesan ema, no ita hatama ohin, iha kurríkulu ne’e iha matéria ida fó maka, Fraternidade Umana, Morál, no Étika,” hatete Dulce de Jesus.

Aprova Estatutu foun PNTL

Iha Konsellu Ministrus ohin, aprova, hafoin reapresiasaun bá projetu Dekretu-Lei kona-bá  Estatutu Polísias hosi Polísia Nasionál Timor-Leste (PNTL), ne’ebé aprova ona iha Sorumutu Konsellu Ministrus iha loron 29 fulan-maiu tinan 2024.

“Projetu Dekretu-Lei, ne’ebé agora halo ona revizaun, mantein objetivu atu estabelese Estatutu  Polísias PNTL nian ne’ebé foun, ho objetivu atu reforsa regulamentu sira ne’ebé iha ona. Entre mudansa sira ne’ebé maka introdús, destaka redefinisaun hosi kritériu sira promosaun nian, ho énfaze ba meritokrasia, no klarifikasaun kona-ba inkompatibilidade ezerse funsaun sira polísia nian,” sita iha komunikadu.

Liután ida ne’e, postu lideransa iha PNTL hetan ajustamentu hodi hatán di’ak liután ba instituisaun nia ezijénsia organizasionál no operasionál atuál. Diploma ida-ne’e reflete importánsia atu garante polísia nasionál ida ne’ebé profisionál, bein treinadu no estruturadu, ho intensaun atu konsolida Estadu Direitu no promove demokrasia iha territóriu nasionál.

Apoiu bá Nunsiatura Apostólika iha Dili

Iha sorumutuk Konsellu ministru ohin, aprova ona mós projetu Rezolusaun Governu nian kona-bá Apoiu bá Nunsiatura Apostólika iha Dili hodi prepara vizita Sua Santidade Papa Francisco nian mai Timor-Leste.

Ho rezolusaun Governu nian ida-ne’e autoriza atu sosa no fó elevadór ida ba Nunsiatura Apostólika iha Dili, hodi instala iha ninia edifísiu, ho objetivu atu hadi’a kondisaun mobilidade Sua Santidade Papa Francisco nian durante nia estadia iha país ne’e, ne’ebé sei hahú iha loron 9 to’o 11 fulan-setembru tinan 2024. Kustu másimu atu sosa elevadór ida-ne’e ho US$ 61,500.00

Konsellu Ministrus aprova mós Rezolusaun Governu nian ida ne’ebé kongratula populasaun tomak ba sira-nia partisipasaun no kolaborasaun ne’ebé signifikativu durante selebrasaun aniversáriu Konsulta Populár nian ba dala 25. Governu louva espíritu unidade, ambiente festa no dame ne’ebé prevalese iha territóriu nasionál tomak, ne’ebé reflete kompromisu kle’an povu timoroan nian hodi harii futuru ida ne’ebé prósperu no armoniozu ba nasaun.

Ho hanoin ba ida-ne’e, Governu apela ba populasaun atu mantein nafatin espíritu dame no unidade ida-ne’e durante Sua Santidade Papa Francisco nia vizita mai Timor-Leste iha semana oin, hodi reafirma karákter oin-na’in no fraternu nasaun timoroan nian.

Konsellu Ministrus aprova mós projetu Rezolusaun Governu nian, ne’ebé aprezenta hosi Ministra Finansas, Santina J. R. F. Cardoso, hodi nomeia Joanico Pinto nu’udár Komisáriu Autoridade Aduaneira tanba konsidera nia kapasidade téknika no esperiénsia profisionál ne’ebé luan tebes.

Jornalista: Rogério Pereira Cárceres