Hatutan.com, (11 Outubru 2024) Díli-Suku balun iha Munisípiu Ermera ho Manufahi to’o agora seidauk iha Ofisial Polísia Suku (OPS) tanba númeru Polisia Nasionál Timor Leste (PNTL) sei menus loos.

Lee Mós: Komandu PNTL Husu OPS Hametin Relasaun ho Komunidade

Komandu Jerál PNTL halo enkontru ho membru OPS sira hodi fó orientasaun servisu seguransa nian. Foto/Dok.Elio dos Santos da Costa

Ofisial Polísia Suku (OPS) hanesan elementu prinsipál husi Planu Estratejiku PNTL nian no implementador atividade estratejiku polisiamentu komunitaria Timor-Leste. Ho nia objetivu aumenta vizibilidade PNTL nian iha komunidade, estabelese parseria metin liutan ho lider komunitaria no autoridade relevante seluk no harii konfiansa komunidade nian ba PNTL iha asaun sira siguransa nian.

Komisaun B Parlamentu Nasionál trata asuntu Negósiu Estranjeiru, Defesa  Seguransa, nota no identifika katak  iha Munisipíu Ermera no Manufahi iha suku balu OPS laiha tanba menus membru PNTL tanba ne’e Komisaun B rekomenda ba  Ministériu Interiór no Komandu Jerál PNTL haree para bele halo rekrutamentu ba PNTL.

“Ita haree efetivu PNTL la to’o nune’e  ita presiza duni, tanba iha fiskalizasaun Komisaun B  nian iha tereñu liuliu iha Munisípiu balu. Purezemplu hanesan iha Ermera, OPS laiha inklui iha Manufahi  mós hanesan OPS iha suku balu mós laiha, ho razaun tanba membru PNTL la to’o, ita nian  PNTL iha nasionál hamutuk de’it na’in-4,000,” membru Komisaun B PN, Deputadu Natalino dos Santos hateten iha PN, Sesta (11/10/2024).

Nia haktuir iha Unidade Patroliamentu Fronteira (UPF) presiza duni halo rekrutamentu tanba ne’e Komisaun B  rekomenda ona Ministériu Interior  no komandu Jeral PNTL atu halo lalais rekrutamentu bá kadete foun Polisia Nasionál para depois bele prenxe bá unidade espesiál, unidade fronteira no mós polísia sira iha munisípíu.

Sita husi relatóriu Fundasaun Mehein (FM) edisaun 2015 sita katak iha tinan 2013 Komandu Jeral PNTL hahú koloka ona OPS ba suku  no tuir orientasaun Komandu Jeral PNTL nian to’o tinan 2015 nia rohan OPS koloka ona iha suku 442 iha teritoriu tomak.

Kolokasaun no funsionamentu OPS

Iha relatóriu Fundasaun Mahein nian ne’e sita katak OPS hanesan membru PNTL ida ne’ebé maka hetan ona treinamentu husi Departamentu Polísia Komunitaria Nasional kona-bá treinamentu baziku, re-treinamentu no treinamentu avansadu, treinamentu espesifiku no hotu-hotu sertifika ona hosi treinamentu hirak ne’e.

OPS ne’ebé koloka iha suku hetan nomeasaun husi Komandante PNTL munisípiu nian. Ho nia rekezitu OPS ne’ebé iha suku ho nia diviza minimu Ajente Xefe no masimu Premeiru Sarjentu.

Maske nune’e tuir FM nia monitorizasaun maioria OPS ne’ebé koloka iha suku ho diviza Ajente no Ajente Prinsipal. Kolokasaun ba OPS iha suku la haree ba mane ka feto no hotu-hotu la iha terminasaun ba idade.

Atu hasa’e vizibilidade polísia nian iha komunidade nia leet to’o Maiu 2015, PNTL koloka ona OPS iha suku 410 husi total suku 442 iha munisípiu 12 ho Rejiaun Administrativu Espesiál Oé-cusse Ambeno (RAEOA). Signifika sei hela suku 32 seidauk koloka OPS.

Jornalista Estajiária: Zita Menezes