Hatutan.com, (14 Outubru 2024), Díli—Governu liuhusi Ministru Juventude, Desportu, Arte no Kultura (MJDAK), Nelio Isaac Sarmento, fó hanoin ba lideransa Federasaun Futebol Timor Leste (FFTL) atu kuidadu ho sansaun husi AFC bá jogadór selesaun nasionál tanba falsifikasaun idade ka tinan jogadór nian, inklui preparativus ba kongresu FFTL ne’ebé la’o la tuir padraun estatutu FFTL inklui kódigu konduta kongresu ho  kódigu  disiplina FFTL.

Lee Mós: Amante Futeból Konsidera FFTL Sei Domina ho Mafia

Antigu Sekretáriu Jerál FFTL no atuál Ministru Juventude, Desportu, Arte no Kultura, Nelio Isaac Sarmento. Foto/Dok

Liuhosi entrevista via WhatsApp ho Ministru Nelio Isaac Sarmento, Segunda (14/10/2024), afirma Governu fó hanoin ba lideransa FFTL atu kuidadu preokupasaun sira ne’e, tamba futeból la’ós de’it ona FFTL nian, maibé família futeból Timor-Leste nian hotu.

Ministru Nelio Isaac Sarmento ne’ebé daudaun ne’e hala’o hela servisu Estadu nian iha Rejiaun Administrativu Oé-Cusse Ambeno (RAEOA) haktuir hodi husu ba Prezidente Interinu FFTL, Tenente Jenerál Domingos Raul “Falur Rate Laek”  atu halo investigasaun internal hodi hatene problema sira ne’e hotu, no ba kuadru sira ne’ebé ativu hela hodi haree problema sira ne’e hotu.

“Governu husu karik bele non ativu tiha hotu hodi kria fali komisaun normalizasaun independente hodi realiza kongresu tuir mai,” Ministru Nelio Isaac Sarmento afirma.

Nia dehan, Governu respeitu tetebes FFTL nu’udár organizasaun independente no lakohi atu intervein iha kestaun  saida deitt FFTL nian, maibé buka atu solusiona internalmente hodi fó satisfasaun ba publika.

Komisaun Nasionál Desportu ne’ebé lidera husi Governu, agora daudaun hala’o hela investigasaun, ba problema sira ne’e hotu no sei hato’o ba públiku kona-bá aktu sira ne’ebé halo husi Sekretáriu Jerál FFTL, Gregorio Correia.

Husu Suspende Gregório Correia husi SekJen FFTL  

Karta aberta MJDAK ba lideransa FFTL. Foto/Repro

Ministru Juventude, Desportu, Arte no Kultura (MJDAC, sigla portugés), husu ba Prezidente Interinu Federasaun Futeból Timor-Leste (FFTL), Tenente Jenerál Domingos Raul “Falur Rate Laek” atu suspende Gregório Correia husi kargu nu’udar Sekretáriu Jerál (SekJen) FFTL tamba la kumpre no hala’o devér ho profesionál no komete mós aktu irregularidade sira ba konferénsia asosiasaun futeból munisípiu no kazu falsifikasaun idade ba jogadór selesaun nasionál Jaimito Antonio da Costa Soares no António da Costa Soares Moniz.

Karta aberta husi MJDAC ba Prezidente Interinu FFTL ne’ebé Hatutan.com asesu iha Segunda (14/10/2024) ho Númeru Referénsia 32/RDTL/MJDAC/GM/X/2024, loron 11 fulan-Outubru 2024  ho Asuntu Haree ba dezagradu kona-ba pena AFC nian ba jogadór Jaimito Soares no la kumpre ba Estatutu FFTL nian ba iha Kongresu FFTL 2024.

Konsidera katak paixaun boot ida husi povu Timor-Leste mak futeból, no konsidera númeru adeptu sira husi desportu ida-ne’e labele tan atu sura, ne’e signifika katak agora futeból rekoñese hanesan atividade desportivu ida-ne’ebé interese públiku nian.

Modalidade futeból lori prestíjiu boot ba Timor-Leste no Timoroan hotu orgullu tebes ho vitória sira husi ekipa nasionál futeból nian, hodi halo ida-ne’e sai nu’udar responsabilidade boot ba Federasaun Futeból Timor-Leste (FFTL), atu prepara no monitoriza ekipa nasionál no promove ita-nia atór foin-sa’e sira.

Tuir notísia nasionál no internasionál ne’ebé Governu simu ona, no konsidera laran-susar no keixa sira husi órgaun desportivu oioin, asosiasaun sira, klube bola no populasaun jerál ne’ebé hatudu hahalok-di’ak ba bola iha Timor-Leste, kona-ba kazu jogadór nasionál Jaimito Soares, ne’ebé hetan pena husi AFC no kona-ba FIFA la satisfás ho adiamentu kontinua husi Kongresu Nasional ba desizaun órgaun FFTL nian, no ida-ne’e la kumpre mós estatutu FFTL nian sira.

“Ha’u mai hatudu nota kona-bá deskontentamentu husi Governu Timor-Leste, atu nune’e kontinua respeita ba regra no estatutu sira husi FFTL. Ha’u fiar katak Governu iha devér atu promove atividade desportu sira ne’ebé iha interese públiku no FFTL iha responsabilidade ne’ebé define iha rejime estatutu sira, hanesan órgaun reguladór ba forma futeból iha Timor-Leste,” Nelio Isaac Sarmento deskreve iha nia karta aberta ba prezidente interinu FFTL.

Haree ba lei nasionál no regra internasionál sira ne’ebé regula bola iha Mundu no Aziátiku, presiza FFTL prepara didi’ak atu evita situasaun dezastre ba Timor-Leste no sempre respeita estatutu Asosiasaun Futeból Munisípiu, Kódigu no Etika Dixiplinár husi FIFA no Kódigu Eleitorál ba membru sira FFTL nian.

Konsidera katak Governu iha responsabilidade atu superviziona organizasaun desportiva sira liuhusi Komisaun Desportu Nasional (CND), ne’ebé ha’u husu kolaborasaun FFTL nian, ho autoridade sira ne’ebé kompetente no administrativu hodi identifika autór sira husi aktu sira ne’ebé estraga ona ita-nia imajen bola iha nivel nasionál no internasionál, no atu nune’e bele evita tan sansaun sira husi AFC ba ita-nia Jogu sira no rezolusaun nasionál urjente ba eleisaun ba órgaun foun FFTL nian tuir estatutu atuál sira.

Haree ba karta ofisiál notifikasaun FIFA nian kona-ba organizasaun Kongresu 2024 nian, Ministru Nelio Isaac Sarmento husu ba FFTL atu regulariza prosesu reguladór ba membru sira ne’ebé kompleta ona sira-nia mandatu no hala’o Kongresu Nasional FFTL nian durante tinan 2024, hodi nune’e, nomeia Komisaun Padraun Futeból FFTL nian, hodi konsidera nesesidade ba dezenvolvimentu ida-ne’ebé saudavel iha Timor-Leste.

FFTL tenke hili Komisaun Independente atu bele omóloga no konfirma desizaun Asosiasaun Futeból Munisípiu nian, atu nune’e, bele evita interferénsia direta husi órgaun FFTL sira iha eleisaun Asosiasaun Futeból Munisípiu nian.

“Konsidera ba prosesu husi AFC nian ba jogadór no pedidu husi FIFA atu hala’o kongregasaun FFTL iha tinan 2024 nia rohan, no informasaun ne’ebé Governu simu ona husi Asosiasaun Futeból sira maka FFTL tenke suspende Sekretáriu Jerál FFTL, Gregorio Correia  ba aktu administrativu hodi rejistu ekipa selesaun nasionál ho Jogadór ne’ebé falsifika idade hodi tuir kompetisaun AFC U19 Championship no AFC U23 Asian Cup, interfere ona iha prosesu eleitorál FFTL nian, la respeita estatutu FFTL nian no Asosiasaun Futebol Munisipiu nian, no la apropriadu hala’o sorumutu ezekutivu sira ba aprovasaun ba dokumentu eleitorál sira no tuir Estatutu FFTL nian no Kodigu Konduta FIFA nian.” Hatutan.com sita karta aberta MJDAC ba FFTL.

Tuir Governu nia haree katak FFTL tenke nomeia Sekretáriu Jerál FFTL foun ida atu bele ezekuta pedidu foun FIFA nian atu hala’o Kongresu FFTL tuir Estatutu FFTL no ne’ebé la ezerse influénsia direta ba prosesu eleitorál asosiasaun futeból munisipál sira-nian, no hala’o sorumutuk estraordináriu atu aprova prosesu eleitorál FFTL nian, tuir Kódigu Eleitorál.

“Ha’u fiar katak Prezidente interinu FFTL iha kompeténsia atu rezolve aktu sira ne’ebé akontese, no órgaun oin-oin FFTL nian kumpre Estatutu FFTL, Kódigu Etika no Disiplina, Kódigu Eleitorál no Kódigu Konduta FIFA nian, hodi nune’e, bele aplika sansaun nasionál ba autór no partisipante sira kona-bá asaun sira ne’ebé estraga dezenvolvimentu futeból iha Timor-Leste, hodi nune’e, bele proteje interese nasionál sira husi futeból, hodi evita situasaun konflitu internu.”

Ba desportu ne’ebé di’ak liu no justu liu iha Timor-Leste, liuliu futeból, Ministru Nelio Isaac Sarmento  agradese ba hotu-hotu nia kolaborasaun no kompriensaun, ba preokupasaun Governu nian, ne’ebé iha pozisaun neutrál no respeita autonomia FFTL nian.

“Se la iha diskusaun tan iha momentu ne’e, ha’u simu garantia ba konsiderasaun ho respeitu boot liu no kumprimentus,” Miniustru Nelio Isaac Sarmento iha nia karta aberta ba FFTL ne’e.

Jornalista: Vito Salvadór