Hatutan.com, (08 Novembru 2024), Díli- Primeiru-Ministru (PM), Kay Rala Xanana Gusmão, afirma IX Governu Konstitusionál simu krítika husi parte hotu, liu-liu bankada opozisaun iha Parlamentu Nasionál atu bele hadi’a di’ak liután servisu sira hodi servi povu ho di’ak.

Lee Mós: OJE 2025 Billaun $2,6 Pasa iha Jeneralidade ho Votu A-favór 42

PM Xanana akompaña hosi nia vise-PM na’in-rua iha diskusaun OJE 2025 iha PN. Foto/Elio dos Santos da Costa

Primeiru-Ministru Kay Rala Xanana Gusmão hato’o deklarasaun ne’e iha Parlamentu Nasionál, Sesta (08/11/2025), hodi hatán ba krítika sira husi deputadu sira bankada opozisaun relasiona ho dezempeñu servisu IX Governu Konstitusionál nian iha tinan 2024, iha área Saúde, Edukasaun,  Agrikultura, no setór importante sira seluk hodi diversifika ekonómika no lori dezenvolvimentu ba povu.

Primeiru-Ministru Kay Rala Xanana Gusmão, hateten povu hili IX Governu Konstitusionál atu korrije de’it irregularidade iha jestaun finansas públika. Nune’e,  bainhira temi katak orsamentu Jerál Estadu ne’e anuál, hahú husi loron 01 fulan-Janeiru too loron 31 fulan-Dezembru, no orsamentu estadu jere ho prinsípiu orsamentu ba kada programa, maibé mosu fali grande opsaun ne’e mak halo IX Governu Konstitusionál preokupa, nune’e hadi’a tiha hodi hatama fila-fali sistema ida ne’ebé uluk dehan aat hela, mais bele responde ba nesesidade ba uza fundu petrolíferu ne’e.

“Ha’u laiha buat barak, ha’u agradese tebes krítika ne’ebé iha, para ami bele hadi’a nafatin ami nia kbiit ezekusaun hodi servi povu ne’e di’ak liután,” Xanana hateten.

Kada governu tenke aprezenta ba Parlamentu Nasionál planu no programa ba tinan lima, ho ida ne’e maka IX Governu Konstitusionál dehan katak 2024 atu haree ba irregularidade ne’ebé iha karik, sei korrije, no 2025 mak sei hahú.

Xanana ho nia Governu promete iha tinan 2025 nu’udár tinan implementasaun tanba bele iha ona sistema jestaun finansas públika ne’ebé di’ak ona hodi bele sai iha portal Transparénsia ba públiku tomak atu hatene halo saida ona no gasta ba saida ona. Tanba ne’e, opozisaun ajuda ho krítika govenru simu no iha mandatu tinan lima ne’e fó nafatin krítika atu governu  hodi kontinua hadi’a no servi di’ak liután.

Xanana iha maturidade polítika no merese hetan respeita

Deputiku Bankada FRETILIN David Dias Ximenes “Mandati” hateten iha debate OJE tinan fiskál 2025 durante loron-tolu ne’e, nia nonook no akompaña hodi observa situasaun no nota katak Primeiru-Ministru Kay Rala Xanana Gusmão, ne’ebé ho fuan-boot hodi simu krítika hotu ne’ebé deputadu sira bankada opozisaun hato’o.

“Maun Xanana, irmaun kampanáriu da Luta, ha’u sei la ko’alia kona-ba proposta sira ne’e, ha’u atu dehan de’it hanesan ne’e, loron-tolu ne’e ha’u tuur nonook observa, ha’u observa ita-boot nia atitude, kalma, carinho, embora krítika barak ita-boot retoma fali uluk ninian ne’ebé ha’u koñese. Ulu-uluk ita-boot kuandu tama mai iha ne’e asvés ita-boot nervozu, asvés hasai liafuan balun ne’ebé ladún di’ak, mais ohin ha’u bele observa katak ita-boot nafatin hanesan uluk, ita-boot hatene, ha’u obrigadu boot, agradese,”  Deputadu David Dias Ximenes “Mandati” hosi Bankada FRETILIN hateten.

Deputadu ne’e mos argumenta liután katak Primeiru-Ministru, Kay Rala Xanana Gusmão, hatene halo diferensa, tanba diferensa ne’e mak dinamiza moris ida-ne’e.

“Ita-boot nia jestaun ba diferensa ne’e maka ita bele manán funu, ha’u la’ós ema-ida ke halo iluzismu baratu, tan ha’u koñese ita-boot, ha’u hatene bele ita-boot la koñese no la gosta, mais ita boot koñese katak ha’u la’ós ema-ida ke halo Iluzismu baratu,” tenik nia.

 Iha diskusaun loron datoluk nian ne’e, Primeiru-Ministru, Kay Rala Xanana Gusmão, husu ba Deputadu sira husi Bankada CNRT atu labele defende nia naran iha debate OJE 2025 iha plenária Parlamentu Nasionál.

“Atan-oan husu ba Deputadu sira CNRT, lalika defende fali ha’u-nia naran, atan-oan ha’u ne’e se?, ita iha ne’e diskute orsamentu la’ós atu ba foti-aan, buat ida la folin aat hanesan ha’u ne’e mak imi ba defende fali ha’u, hasai tiha buat ne’e husi imi-nia ulun favor ida bainhira ita diskute orsamentu,” Xanana afirma.

Jornalista: Vito Salvadór