Hatutan.com, (14 Novembru 2024), Díli- Prezidente Repúblika, José Ramos-Horta,  Kinta (14/11/2024), iha Palásiu Prezidensiál, halo abertura ba festivál ai-han, ai-horis no arte hodi selebra loron feto emprendedora no sustentabilidade ambientál.

Lee Mós: Prezidénsia Repúblika ho Governu Promove Komponente Haat Importante bá Promosaun Turizmu Timor-Leste

PR Ramos-Horta, halo abertura ba festivál ai-han, ai-horis no arte hodi selebra loron feto emprendedora no sustentabilidade iha iha Palásiu Prezidensiál, Kinta (14/11/2024). Foto/Tome da Silva

Festivál ai-horis, ai-han, no arte  ne’e ho tema “Go Green, Buy Local” durante loron tolu hodi selebra loron emprendedorizmu feto timoroan no sustentabilidade ambientál.

Festivál ne’ebé organiza hosi Unidade Empoderamentu Ekonómiku Feto nian (EEW), hatudu vendedór feto lokál sira ne’ebé hatudu produtu artezanatu, ai-horis, no ai-han tradisionál sira.

Objetivu husi festivál ne’e atu hasa’e vizibilidade ba emprezária sira. Kria oportunidade sira ba envolvimentu entre vendedór no kliente. Ajuda feto sira estabelese sira-nia marka negósiu. Rekoñese no selebra feto Timoroan sira nia susesu. Promove sustentabilidade ambientál no konxiénsia kona-ba resiklajen

Eventu ne’e hahú ho esperiénsia degustasaun hahán espesiál husi grupu vendedór Ai-Han Timor Street Food, ne’ebé oferese hahán tradisionál Timor nian ba distintu bainaka sira, inklui reprezentante governu, parseiru dezenvolvimentu, no membru korpu diplomátiku sira.

Destaka sira hosi festival loron tolu nian inklui: Espozisaun ai-horis no arte nian ne’ebé hatudu feto emprezária lokál sira. Kompetisaun ba ezibisaun kriativu di’ak liu no aprezentasaun tenda nian. Oportunidade interkámbiu kulturál ho embaixada sira ne’ebé partisipa. Atividade interativu inklui sorteiu ba prémiu no rifa. Hatudu prátika negósiu sustentável sira. Vendedór ai-hán no bebida lokál sira.

“Forsa husi ita-nia nasaun iha inovasaun no determinasaun husi ita-nia feto emprezária sira, no sira-nia kompromisu ba prátika negósiu ne’ebé sustentável,” José Ramos-Horta hateten.

“Festivál ida-ne’e reprezenta oportunidade úniku ida atu hatudu talentu inkrível sira hosi ita-nia feto na’in ba negósiu lokál sira enkuantu promove konxiénsia ambientál. Hodi halibur ita-nia komunidade nia forsa kriativu sira ho advogadu ambientál sira, ita harii futuru ida ne’ebé sustentável no ekuitativu liu ba Timor-Leste,” tenik Ramos-Horta.

Inisiativa ida-ne’e aliña ho Prezidente Repúblika nia kompromisu atu apoia feto sira-nia empoderamentu ekonómiku enkuantu promove sustentabilidade ambientál no prezervasaun kulturál.

Jornalista: Vito Salvadór