Hatutan.com, (26 Novembru 2024), Díli-Empréza BORNEO Corporation hosi Brunei Darussalam hakarak investe iha atividade produsaun animál, liu-liu hakiak-manu iha Munisípiu Baucau.

Lee Mós: Vise-PM Francisco Kalbuadi Lay Mobiliza Bilionáriu Nain-tolu Mai ho Jet Privadu

Embaixadór TL bá Brunei Darussalam, Abel Guterres lori investór hosi Brunei Darussalam atu hakiak-manu iha Baucau. Foto/Tome da Silva

Insiativa bá investimentu ida ne’e hato’o direta hosi na’in bá Empréza BORNEO Corporation, durante enkontru ho Xefe Estadu, José Ramos-Horta, iha Palásiu Prezidénsia, Díli, Tersa (26/11/2024).

Hafoin enkontru, Embaixadór TL bá Brunei Darussalam, Abel Guterres ne’ebé akompaña enkontru ne’e informa, sira-nia enkontru ho PR José Ramos-Horta  koalia kona-bá investimentu ne’ebé mai hosi liur, ida ne’e hanesan investimentu, hahú hosi rai Brunei, no tuir planu, iha loron 29 fulan-Novembru tinan ne’e, sei hahú dadauk ona prosesu investimentu nian iha Baucau.

“Investimentu ne’e atu halo iha área kakiak-manu. Ne’ebé, ha’u hein katak, jornalista sira sei iha oportunidade iha loron 29 fulan-Novembru ne’e bele bá haree, no mós halo reportájen bá públiku iha Baucau. Investór ne’e mai hosi BORNEO Corporation, mas, baze iha Brunei Darussalam,” Embaixadór TL bá Brunei Darussalam, Abel Guterres, informa.

Investimentu ne’e sei hahú uluk iha Baucau, hafoin espande tán bá munisípiu sira seluk. Kona-bá kapitál, nia dehan, investimentu ne’e hahú ho ki’ik, depois sa’e bá boot. Nune’e, Prezidente Repúblika, José Ramos-Horta hato’o nia boas-víndas bá investór hosi BORNEO Corporation, no mós investór sira sleuk mai hosi rai oioin ne’ebé hakarak halo investimentu iha Timor-Leste tanba sei empréga Timoroan sira.

Jornalista: Rogério Pereira Cárceres