Hatutan.com, (05 Dezembru 2024), Díli-Komandu Polísia Nasionál Timor-Leste (PNTL) deside kontinua avansa ho prosesu kriminál no dixiplinár hasoru nia membru na’in-haat ne’ebé deskonfia envolve  iha rede importasaun foguete ilegál.

Lee Mós: Deskonfia, Pesoál Membru PNTL Na’in-haat Envolve iha Importasaun Fogete Ilegál

Komandante Jerál PNTL, Komisáriu Polísia Henrique da Costa. Foto/Elio dos Santos da Costa.

Forsa konjunta deteta envolvimentu membru PNTL na’in-haat ne’e akontese iha Domingu (01/12/2024), hale’u tuku 02:30 madrugada, iha área Pala, Munisípiu Liquiça no konsege prende sasán importasaun ilegál hanesan fogete kaixa-haat, ho montante iha laran; ida  shoot ualu (8) ne’e 288, Happy Flower ida kaixa-ualu, no seluk-seluk tán.

Komandante jerál PNTL, Komisáriu Jerál Polísia, Henrique da Costa, esplika, prosesu rua ne’ebé mak dadauk ne’e komandu avansa mak hanesan, kriminál ho dixiplinár.  Katak, ida kriminál, rejísta ona iha Departamentu Investigasaun Kriminál Nasionál, hafoin sei enkamiña bá iha Ministériu Públiku, no ida dixiplinár nian Departamentu Justisa PNTL mak atende.

“Hahú ona prosesu. Sira sei relata mai iha komandu atu nune’e bele foti medida,” Komisáriu Jerál Polísia Henrique da Costa, informa bá Jornalista sira iha Sentru Formasaun Polísia-Akadémia, Comoro-Díli, Kinta (05/12/2024).

Komandante jerál PNTL ne’e dehan, hosi DIK Nasionál nia rezultadu investigasaun ida ne’e nian maka, komandu bele haree, bele foti medida kautelár, ka hanesan halo transferénsia ka suspensaun.

Liuhosi Konferénsia Imprénsa,  Segunda (02/12/2024), Komandante Departamentu Investigasaun Kriminál  Nasionál, Superintendente Polísia João Belo dos Reis, la informa klaru kona-bá membru pessoál PNTL na’in-haat ne’e, sira servisu iha komandu ida ne’ebé, inklui la temi identidade insial hosi membru sira ne’e nian.

Jornalista: Rogério Pereira Cárceres