Hatutan.com, (12 Dezembru 2024), Díli- Prezidente Repúblika (PR), José Ramos-Horta, partisipa iha serimónia pose ba membru voluntáriu korpu da Pás (Peace Corps) na’in-17 husi Amérika ne’ebé maka sei halo servisu voluntáriu iha Timor-Leste.

Lee Mós: Voluntáriu Korpu bá Pás Hosi Amérika Hahú Servisu ho Komunidade

Membru voluntáriu Korpu da Pás hosi Amérika simu pose hodi serbisu ho komunidade sira. Foto/Espesiál

Prezidente Repúblika José Ramos-Horta ba jornalista sira iha Otél Timor, Kinta (12/12/2024) hateten ne’e hanesan aprezentasaun serimónia juramentu grupu foun husi korpu da pás (Peace Corps) husi Estadu Unidus Amérika ne’ebé maka halo servisu voluntáriu iha Timor-Leste.

Xefe Estadu haktuir Programa Korpu da Pás iha Timor-Leste hahú tinan 10 resin oan, uluk hanesan Ministru Negósiu Estranjeiru lobi para haruka kopu da pás.

Korpu da Pás nia ema balun iha estudu exelénsia profisionál, balun laiha tanba sira joven, no balun fali idade ona no iha esperiénsia profisionál.

Peace Corps ka korpu da pás iha prezensa iha rai atus ida resin iha mundu, programa ne’e mai husi Prezidente Kennedy iha tinan 60, nian maka ho nia vizaun kria programa ida ne’e.

“Sira mai servisu no hela ho komunidade kiak iha aldeia no suku sira, sira la bele hela iha Otél no la bele hela iha Munisípiu laran, maibé tenke hela iha aldeia no suku no tenke hela ho ema kiak,” Prezidente Repúblika José Ramos-Horta hateten.

Prezidente Repúblika dehan membru korpu da pás sira konsentra iha fatin ida, halo estudu ba língua, kultura Timor nian, no estuda tetun didi’ak, depois maka sira ba foho. Durante fulan tolu sira la bele mai Dili, fulan tolu liu maka sira bele pasiar.

Efeitu pozitivu husi misaun Korpu da Pás  ne’e di’ak los, tanba ne’e xefe estadu husu ba Korpu da Pás atu tenta konsentra hanorin Inglés, tanba joven barak iha Foho  sira hakarak aprende Inglés, joven barak mós aprende ho sira atus ba atus. Nune’e mós husu sira atu hanorin mós konektividade IT, saúde publika, seguransa alimentár no hahán no inklui mós agrikultura.

“Sira mai ita nia rai, ita simu sira ho di’ak, komunidade, aldeia no suku sira simu sira di’ak, ida ne’e sira sai hanesan embaixadór boa vontade ba ita iha li’ur, tanba joven sira ne’e balun mai husi ema importante iha Amérika,” Ramos-Horta tenik.

Iha fatin hanesan, Embaixadóra Estadu Unidu mai iha Timor-Leste, Donna Ann Welton hateten hakarak uza momentu balun agradese ba Prezidente Repúblika José Ramos-Horta ne’ebé fó pose ba klase foun hamutuk ema nian sanulu-resin-hitu, hodi ezerse sira nia misaun servisu hodi apoiu dezenvolvimentu iha Timor-Leste.

“Ha’u bele dehan katak relasaun di’ak ne’ebé iha entre ita nian nasaun rua ne’e, Peace Corps  ka Korpu da Pás muda ema barak nia moris no muda família no inklui komunidade sira,” Donna Ann Welton hateten.

Parabéns ba voluntáriu foun sira husi Korpu da Pás, orgullu tebes ho imi nia paixaun atu hadi’a dezenvolvimentu ekonómiku komunitáriu ho edukasaun ida iha Timor-Leste.

PR Ramos-Horta konversa hela ho membru voluntáriu Korpu da Pás hosi Amérika. Foto/Espesiál

Durante semana 10 kotuk ba voluntáriu sira partisipa formasaun intensivu hodi aprende lian tetun kultura timor, abilidade tékniku no aprende oinsá atu hela no halo servisu iha Timor-Leste ho susesu, saudavel no seguru.

Reprezenta Korpu da Pás voluntáriu mai iha Timor-Leste, Katherine Ellis hateten Sai hanesan onra ida mai ami atu reprezenta ami-nia grupu hodi mai hamriik iha ne’e, iha selebrasaun tomada-de-pose ida-ne’e hodi ami bele sai nu’udar voluntáriu Korpu da Pás.

Nu’udar ema Amerika, ami iha oportunidade úniku ida-ne’e hodi hela hamutuk ho Timoroan sira, no ho fuan tomak, sira simu ami iha sira-nia uma no iha sira-nia komunidade. Ami aprende kona-ba kultura Timor-nian, nune’e mós ami fahe ami-nia kultura ho Timoroan sira. Ho ida-ne’e, dame hahú iha uma ida-idak. Bainhira ami tuur hamutuk iha varanda no hemu kafé, toka múzika no kanta hamutuk, ka konta história ba malu, ami kria amizade ba malu, no ami hahú harii hún ida ba dame iha mundu ne’e. Momentu hanesan ne’e fó-hanoin mai ami katak dame hahú ho hatudu respeita no halo belun ba malu.

“Ita ida-idak iha istória úniku, abilidade úniku, no iha hakarak ne’ebé úniku. Ida-ne’e halo ha’u hanoin kona fali akadémiku Amérika nian ida, ninia naran.” Hateten Katherine Ellis.

Ba staf Korpu da Pás, hakarak hato’o obrigada, tanba gia ona ami voluntáriu sira durante ami-nia fulan rua ho balun primeiru iha Timór. Ita-boot sira hanorin ami oinsá atu sai voluntáriu ne’ebé susesu, hanorin ami kona-ba kultura, lingua, no ema Timór nia karakteristika. Ami bele haree ita- boot sira komprometidu tebes ba ita-boot sira nia serbisu no nasaun. Lider ne’ebé efetivu kria voluntáriu ne’ebé efetivu mós, no ita-boot sira gia ona arni ho di’ak. Ami agradese ba oportunidade hodi koñese no serbisu ho ita-boot sira.

“Agora, ita kompromete hodi serbi ba tinan rua. Maibé, depoiz  tinan rua ne’e, ita sei iha oportunidade atu kompromete, no kompromete fali ba moris ida ne’ebé nakonu ho dame. Hanesan kabas-lahan iha tais nian ne’ebé sei kaer malu hamutuk to’o rohan-laek, no ha’u espera ida-ne’e sai inisiu ba serbi ema seluk no kria dame rohan-laek iha mundu ida-ne’e.” Tenik nia.

Reprezenta Korpu Voluntáriu mai iha Timor-Leste, Ian Bar, hateten Semana sanulu liubá, ami hahú ami-nia viajen, ami ema na’in sanulu resin hitu ne’ebé la koñese malu sa’e aviaun hamutuk atu mai Timor-Leste. Nasaun ki’ik ida ne’ebé ami nunka rona nia naran, ne’ebé nakonu ho ema ne’ebé seidauk koñese ami. Durante tempu badak nia laran ami iha ne’e, ami aprende barak tiha ona. Durante tinan rua oinmai, ami sei serbisu iha ne’e, ami espera ami bele aprende barak liután.

Ami hotu agradese tebes hodi hela iha Timor-Leste, no kontente tebes atu hahů serbisu hamutuk ho komunidade no ho Korpu da Pás.

“Ami voluntáriu sira hotu mai hosi fatin ne’ebé la hanesan, moris ne’ebé la hanesan, no fiar ne’ebé la hanesan, Ami mai Timór hodi serbisu hamutuk ho tatin Timoroan sira neʼebé mai husi munisipiu la hanesan, kultura ne’ebé la hanesan, no koali’a lian ne’ebé la hanesan. Maibé ami hotu iha sentimentu ida ne’ebé hanesan, sentimentu esperansa ba futuru Timór nian. Sentimentu ne’ebé ami haree iha labarik ida-idak, iha ami-nia maun-alin no feton ho nan ida-idak, no inan-aman no avó ida-idak ne’ebé ami hasoru,” Ian Bar hateten.

Nia hatutan voluntáriu Korpu da Pás mesak, labele halo buat ida bainhira la envolve Timoroan sira. Korpu da Pás sira hotu iha mundu tomak labele halo buat-ida la ho ema hosi nasaun sira ne’ebé sira sei bá.

Jornalista: Vito Salvadór