Hatutan.com, (17 Janeiru 2025), Metinaro— Ministériu Saúde liuhosi Institutu Nasionál Farmásia no Produtu Médiku (INFPM),  Sesta (17/01/2025), halo destruisaun ba produtu medikamentu hamutuk item 165 iha lixeiru Suku Oenunu, Postu Administrativu Metinaro, Munisípiu Díli tanba liu ona prazu.

Lee Mós: Ministériu Saúde Sei Kompras Produtu Medikamentu Item 391

INFPM destruisaun ba produtu medikamentu liu prazu ne’ebé akomula hosi tinan 2020-2024. Foto/Tome da Silva

Produtu medikamentu hirak-ne’e akomula hosi tinan 2020 to’o 2024 no tuir padraun Ministériu Saúde tenke lori ba destroi atu labele fó impaktu ba saúde públiku no ambiente.  

Diretór Ezekutivu INFPM, Brigido Dias, klarifika produtu medikamentu hirak ne’e kompostu husi  konsumaveis no ekipamentu laboratóriu.

“Akumulasaun ne’e  la’ós husi orsamentu jerál estadu, maibé doasaun husi ita-nia parseiru ka doadór sira hanesan Organizasaun Mundiál Saúde (OMS) ,Unicef ho UNFPA ne’ebé mak durante ne’e ita akumula husi situasaun Covid-19 nian,” Brigido Dias hateten.

Brigidio esplika destruisaun ne’e mós sai preokupasaun ba públiku  tanba ho item ne’ebé mak barak, maibé ida ne’e la’ós tinan ida nian, maibé  ne’e akumulasaun husi 2020 mai too fulan-Dezembru 2024.

Destruisaun produtu medikamentu ne’e  sura ho orsamentu hamutuk $1,332,904,81 ne’ebe  sosa ho OJE  nian hahú husi tinan 2020-2024  ho orsamentu total $438,892,70 ho nia item hamutuk 127, Fundo Global orsamentu hamutuk $25,758,73 ho item 12, UNDP  ho orsamentu hamutuk  $8,065,40 ho item lima (5), husi OMS ho orsamentu hamutuk $ 225,956,54 ho item  sia (9), UNFPA  ho orsamentu hamutuk $168,302,51 ho item neen (6), husi UNICEF ho orsamentu  hamutuk $465,928,93.

Produtu medikamentu ne’ebé liu prazu mak barak ne’e tanba Governu prepara no antesipa  ba surtu, hanesan ezemplu surtu  Covid-19 ema hotu ta’uk,  entaun governu prepara ai-moruk barak no hetan mós apoiu husi doadór sira depois bainhira  surtu ne’e hotu sasán sira ne’e la uza, nune’e  INFPM rai to’o prazu liu.

Produtu medikamentu hirak-ne’e durante ne’e rai iha armazén iha Dili  inklui iha  rejionál sira iha munisípiu tolu hanesan Baucau, Ainaro ho Bobonaro.

Akompaña  atividade  destruisaun ne’e kompostu husi INFPM, Klinika Stamford, Ministériu Saúde, FALINTIL-Forsa Defeza Timor Leste ( F-FDTL) no Ospitál Nasionál Guido Valadares ( HNGV).

Jornalista : Leopoldina de Carvalho