Hatutan.com, (15 Fevereiru 2025), Díli– Prezidente Partidu FRETILIN, Francisco Guterres “Lú-OLo” konsidera Guvernu atuál ne’ebé lidera hosi Primeiru-Ministru Kay Rala Xanana Gusmão halo urbanizasaun sidade Díli kuaze hakat liu legalidade ka lei  espropriasaun bá utilidade públiku nian nune’e eviksaun iha Dili agora daudauk halo povu terus duni.

Lee Mós: Molok Halo Eviksaun iha Semana Oin, SEATOU Vizita Komunidade Kuluhun To’o Becora

Prezidente partidu FRETILIN, Francisco Guterres “Lú-Olo”. Foto/Elio dos Santos da Costa

Lú Olo hateten planu atu halo urbanizasaun sidade Díli ne’e atu la’o oinsá governu la hateten sai, nune’e ema ida la hatene maibé derrepente de’it Sekretáriu Estadu Toponímia no Organizasaun Urbana (SEATOU) Germano Santa Brites Dias ho nia ekipa to’o iha ne’ebá sobu de’it halo populasaun terus no ida-ne’e la admite.

“Atu hateten katak iha baze legalidade liu  ne’e kuaze Nonu governu hakat liu hotu ona, nune’e Lei bá espropriasaun bá utilidade públiku nian, tanba ne’e, tenke respeitu ema nia propriedade privadu se bainhira Estadu hakarak atu okupa Estadu rasik tenke prioridade sira hotu Estadu rasik tenke tun hosi kadunan asa ne’e mai ko’alia ho partikulár sira para halo justa indemnizasaun antes atu halo transferénsia titular ba Estadu atu bele Estadu lori halo saida de’it,” Prezidente Repúblika  períodu 2017-2022 ne’e esplika hodi responde jornalista iha ámbitu II Kongresu Nasionál Partidu Libertasaun Populár (PLP) iha Salaun OKA, Osindo, Díli, Sábadu (15/02/2025).   

Polítiku Governu CNRT ho PD, tuir Lú-Olo, agora daudauk halo terus duni povu, duni povu hasai povu hosi ninia uma la haree ba legalidade sira no lei ne’ebe mak eziste.  

“Antesa hasai buka ko’alia uluk ho populasaun no kria kondisaun molok hasai populasaun.  Ida-ne’e hateten de’it dehan lae ida-ne’e atu halo dezenvolvimentu. sim ! Dezenvolvimentu ita hotu hakarak, maibé dezenvolvimentu sidade Dili ne’e oinsá,”  Prezidente Asembleia Konstituinte ne’e kestiona.

Hanesan públiku hatene ona katak Governu liuhosi SEATOU halo evikasuan obrigatóriu ba komunidade sira iha  Baidau, Comoro, Fomento II, Bebonuk no daudaun ne’e komesa ona ho Kuluhun to’o Becora, inklui Bairu-Pité mai to’o Manleuana ho razaun klásiku mak dezenvolvimentu ka alargamentu estrada.  

Jornalista Estajiáriu Lazaro Pereira Quefi