Hatutan.com, (24 Fevereiru 2025), Díli—Diretór Ezekutivu Servisu Rejistu Verifikasaun Emprezariál, Institutu Públiku (SERVE, I.P), Fausto Soares Dias, rezeita informasaun ne’ebé espalla iha públiku, katak  nia uza nia kompeténsia halo kobransa ba funsionáriu SERVE,I.P sira.

Lee Mós: SERVE Husu Emprezáriu Nasionál Labele Taka Kompañia Bainhira Enfrenta Difikuldade

Diretór Ezekutivu SERVE, I.P, Fausto Soares Dias. Foto/Leopoldina de Carvalho

Tuir dokumentu  ne’ebé espalla no viral iha media sosiál Facebook ne’ebé asina hosi Epifanio Martins Casimiro, hanesan pesoál SERVE,I.P Sukursál Ermera ho data 06 fulan-Janeiru 2025 haktuir katak Diretór Ezekutivu SERVE,I.P atuál husu atu hatama serveza bintang lata ki’ik doos ida no husu osan rahun $100.00 atu selebra nia susesu nomeasaun ba hanesan Diretór Ezekutivu SERVE,I.P periodu 2025-2029.

Fausto Soares Dias, Diretór Ezekutivu SERVE,I.P ne’ebé Hatutan.com konfirma iha nia servisu fatin, Segunda (24/02/2025),  klarifika katak nia parte mós hakfodak ho karta  ne’ebé espalla hodi  akuza nia halo kobransa iha momentu nia sidauk hetan responsabilidade nu’udár diretor ezekutivu atu festeja nia nomeasaun.

“Ha’u foin mai iha loron 03 fulan-Juñu,  sidauk halo kobransa ida ba funsionariu sira iha SERVE,I.P ho total funsionariu 470. Ha’u rejeita informasaun  ida-ne’e,” Fausto Soares afirma.

Daudaun ne’e Fausto Soares Dias ho nia ho advogada sira prepara hela prosesu hodi buka tuir ba karta sira ne’ebé mak espalla iha publiku no submete tuir Lei.

Fausto Soares Dias konsidera akuzasaun sira-ne’e  falsu tanba laiha faktus, ho nune’e, nia husu ba eis-funsionariu ne’ebé hakerek  no espalla karta ne’e atu aprezenta evidensia ba iha Ministeriu Públiku (MP) no Komisaun Anti-Korrupsaun (CAC).

Jornalista: Leopoldina de Carvalho