Hatutan.com, (10 Marsu 2025), Díli -Membru Polísia Nasionál Timor-Leste na’in-505, Segunda (10/03/2025), ofisiálmente entrega sira-nia atributu hanesan membru grupu arte-mersiál no arte-rituál (GAM&GAR) hodi jura serbí de’it povu no rai-doben Repúblika Demokratika Timor-Leste (RDTL).

Lee Mós: Membru F-FDTL 833 no PNTL 272 Ofisialmente Entrega Atributu “Jura” Husik GAM-GAR

Membru PNTL na’in-505 ne’ebé identifika nu’udár membru GAM&GAR, Segunda (10/03/2025), ofisiálmente entrega sira-nia atributu hodi jura serbí de’it povu no rai-doben RDTL. Foto/Elio dos Santos da Costa

Atributu ne’e entrega liu hosi serimónia ne’ebé hala’o iha Kuartél Jerál PNTL, Caicoli, Díli no sira hotu entrega sira-nia farda arte-marsiál ho arte-rituál nian ba Prezidente Komisaun Reguladora  Arte-Marsiál (KRAM),  Octávio da Conçeição.

Membru PNTL hirak ne’e identifika durante ne’e envolve iha arte-marsiál Persaudaraan Setia Hati Terate (PSHT), Ikatan Keluarga Silat Pemuda Timor-Leste (IKSP-TL, Kmanek Oan Timor Rai Klaran (KORK) ho arte-rituál Sete-Sete (77).

Ministru Interiór Francisco da Costa Guterres, ne’ebé asiste direta serimónia ne’e subliña hahú kedas iha loron 07 fulan-Dezembru tinan 2023 to’o mai tinan 2025 ne’e,  kuaze membru GAM ho GAR iha Instituisaun Seguransa kuaze dezvinkula  hotu ona no hala’o servisu ho di’ak tebes.  

“Ikus-ikus ne’e ita haree hatudu postura ida neutru hanesan membru PNTL hakarak duni atu serbí rai ida-ne’e no hakarak hametin de’it iha komunidade nia leet tanba ne’e Ministru Interior lori nonu governu konstitusionál nia hato’o obrigadu tanba ita-boot sira hatudu duni onestidade ho hakarak de’it atu serbí ba estadu no rai ida-ne’e liu hosi vokasaun instituisaun PNTL,” Francisco da Costa Guterres hateten.

Ida ne’e ajuda ona servisu ida ne’ebe ho onestidade no neutralidade ho di’ak hodi garante pás no estabilidade ba Timor Leste.

Iha fatin hanesan Komandu Jerál Polísia Nasionál Timor-Leste Komisáriu Jerál Polísia Henrique da Costa hateten serimónia ba dezvinkulasaun nian ne’ebé mak hala’o ona iha loron 07 fulan-Dezembru 2023 depois kontinua kedas ba iha munisípiu sira hotu nune’e ohin mak foin realiza ikus iha Komandu Jerál PNTL nian tanba ne’e presiza atu informa mós katak fatin Migrasaun nian sira ne’ebé iha RAEOA sira halo iha ne’ebá no balu ne’ebe mak iha Suai sira hala’o iha serimónia Ainaro nian.

“Ha’u fiar katak uluk la iha ema ida atu obriga ita hodi hanorin ita atu envolve iha arte-marsiál no arte-rituál ruma atu halo problema mas depois ita akompaña situasaun sira ne’e ema utiliza sala,” Henrique da Costa hateten.

Nia husu ba membru PNTL hotu atu uza matenek ne’ebé iha defende aan ho profisionál atu serbí PNTL no serbí povu ho nasaun RDTL.

“La’ós halo tiha juramentu ho asinatura ida-ne’e mas iha terrenu sai nafatin duvida ba intervensaun sira ka atuasaun sira iha terrenu la ho neutru,”  nia hateten.

Prezidente KRAM, Octávio da Conceição hateten, faze ikus ba prosesu dezvinkulasaun iha Kuartél Jerál PNTL no apresia ba ekipa servisu hotu ne’ebé mak hala’o iha territóriu Timor-Leste hodi identifika membru sira hotu ne’ebé uluk envolve ka partisipa iha GAM&GAR.

“Hanesan Prezidente KRAM hakarak onestu iha ne’e ha’u koñese ema barak ne’ebe mak envolve iha GAM&GAR iha instituisaun PNTL no mós F-FDTL tan ne’e ha’u haree balu seidauk iha ne’e maibé ida ne’e la’ós ha’u nia kompeténsia,” Octávio da Conceição hateten.

Bainhira iha loron ikus mai kuandu iha problema ruma mak identifika seidauk tama iha prosesu dezvinkulasaun mas nia involve iha pratika GAM&GAR konsekuénsia jurídika tuir despaxu komandu nian idak-idak tenke asume nia responsabilidade.

KRAM husu obrigadu ba komandante PNTL sira ne’ebe mak forma hodi entrega sira-nia atributu GAM&GAR  ba sira-nia onestidade tanba prosesu dezvinkulasaun nu’udár parte ida husi juramentu  atu serbí rai, estadu no povu ida-ne’e ho di’ak.

Jornalista Estajiáriu : Lazaro Pereira Quefi