Hatutan.com, (03 Abríl 2025), Díli–Primeiru Ministru (PM), Kay Rala Xanana Gusmão, sei hala’o vizita espesiál ba Oé-cusse hodi rona opiniaun  ka halo konsulta públiku ida ho povu Oé-Cusse hotu hodi bele hili figura foun Oé-Cusse oan rasik ba Prezidente Autoridade Rejiaun Administrativu Oé-Cusse Ambeno (RAEOA) ho Koordenadór Jerál Zona Espesiál Ekonomia Sosiál Merkadu (ZEESM).

Lee Mós: Xanana Deklara Atoni-oan Lidera RAEOA-ZEESM

PM Kay Rala Xanana Gusmão. Foto/Elio dos Santos da Costa

Primeiru-Ministru (PM), Kay Rala Xanana Gusmão hato’o kestaun ne’e ba Jornalista sira hafoin enkontru semenál ho Prezidente Repúblika (PR), José Ramos-Horta iha Palasiu Prezidensiál, Díli, Kinta (03/04/2025).

“Durante tinan-10 sira hanesan ketak-ketak tiha, tanba ida-ne’e maka Konselhu Ministru mós hanoin ba halerik husi povu atoni ho matenek oan sira iha atoni, maka hasa’e rezolusaun ida . Nune’e Paskua  liu tiha, ha’u sei ba la’o haleu oituan Oé-Cusse, konsulta ho povu hodi anin fuik sira lori sira nia halerik ne’e, ita prova tok se dunik hosi populsaun Oé-cuse nian,” Primeiru Ministru (PM), Xanana Gusmão hateten.

Xefe Governu dehan, Oé-cusse prezija Atoni oan maka ukun nune’e bele hatene problema no kondisaun iha Oé-cusse rasik.

Xanana dehan, sei iha fali reuniaun ida la’ós ho populasaun tomak iha Pante Makasar ho Autoridades lokál sira, postu, PAM ho matenek oan sira ho sosiadade sivíl hodi ko’alia kona-bá sira atu halo saida?, tanba sira nian ne’e dehan iha ne’ebá  kada munisípiu  iha ona ninia ema sira.

“Ami nian iha Oé-Cusse mai bebeik hosi li’ur manda de’it ami, ami mós nune’e hela de’it. Tanba ne’e maka sira maka depois sei ko’alia, karik sira hotu hetan konsensu kona-bá se mak iha ne’e, se maka atu kaer ida -e’e, tuir nia kompetensia, la’ós tanba amigu ka amiga ka maka dehan o mai, mai ba la halo buat ida, lae tuir dunik kompotensia iha prosesu desentralizasaun hanesan mós ita halo daudaun iha rai bo’ot ne’e,” Xanana hateten.

Xefe Governu ne’e hatuir katak, Kuandu sira hotu simu hotu ona, hatudu se lolós tanba sira konese malu, sira rai ki’ik oan ida be sira koñese malu di’ak liu, maka iha akta reuniaun fó fulan-tolu (3) to’o fulan-neen (6) maka nia hatudu nia kbi’it no servisu ho di’ak kontinua, mais fulan-tolu (3) to’o fulan-neen (6) maka hare ba dehan katak atrapailadu deskulpa o sai o ba fali kaer ida ne’ebá, ida seluk maka mai fali kaer ida ne’e.

Jornalista: Tome da Silva