Hatutan.com, (10 Abríl 2025), Díli-Plenária extraordináriu Parlamentu Nasionál, Kinta (10/04/2025), aprová pedidu urjénsia husi Governu  ba proposta Lei PPL nú.16/VI (2a), segundu altersaun nú. 25/2021 Dezembru, lei organizasaun judisiáriu ho rezultadu votasaun afavór 36, kontra 19 no abstensaun  ida (1).

Lee Mós: Grupu Traballu Reforma Justisa Submete Ona Relatóriu Servisu bá Primeiru-Ministru

Parlamentu Nasionál, Kinta (10/04/2025), aprová pedidu urjénsia mai husi Governu ba proposta Lei PPL nú.16/VI (2a) segundu altersaun nú. 25/2021 Dezembru lei organizasaun judisiáriu. Foto/Zita Menezes

Membru  Bankada FRETILIN, Joaquim dos Santos Borululi hatete governu aprezenta proposta ida-ne’e mai Parlamentu Nasionál ho pedidu urjénsia, matéria ne’ebé inklui iha papél ne’e la konstitui pedidu urjénsia, matéria ne’ebé Governu aprezenta mai PN ne’e la nesesáriu no la konstitui razaun bá pedidu urjénsia.

Biban ne’e, membru Bankada CNRT Natalino dos Santos hateten pedidu urjénsia dentru koridór rejimentál, Governu iha kompromisu atu halo reforma justisa. Nune’e Governu hakarak halo ajustamentu bá kuadru legál sira ho norma konstituis sira.

Ministériu Justisa Sergio Hornai iha nian diskursu hateten, relasiona ho proposta ne’ebé Governu haree nesesidade duni atu hato’o mai iha kaza magna ida-ne’e (PN, red), liuhosi Deputadu sira para atu halo apresiasaun, fiskalizasaun no halo desijaun politíka balun.

Nia afirma Governu mai ho hanoin boot ida maka atu bele haree kona-bá proposta lei ida-ne’e nian duni katák nesesidade atu buka entende no komprende lei sira ne’ebé iha kotuk dadauk atu halo priensementu ba iha lakuna no imísiu sira ne’ebé maka iha.

Ho ida ne’e duni, Governu iha tempu sira ne’ebé mai haree katák para atu bele konstitui lejitimidade no mós legalidade sira bá iha instituisaun Estadu nian, relativamente ba iha asuntu sira ne’ebé ligadu ba iha órgaun soberánia Tribunál nian ne’ebé iha konstituisaun RDTL.

“Ita presiza haree hodi nune’e fó lejitimidade politíka no legalidade konstitusionál, atu nune’e, órgaun soberania ne’ebé iha kompetensia bele halo desijaun politíka konstitusional no mós tuir lei sira,” Ministru Sergio Hornai klarifika ba membru PN sira iha plenária.

Jornalista Estajiária: Zita Menezes