Hatutan.com, (10 Abríl 2025), Díli– Xefe Estadu Timor-Leste, José Ramos-Horta rekoñese dedikasaun brigada Médiku Kubana sira durante hala’o misaun iha Timor-Leste hodi kapasita no hasa’e ona abilidade ba médiku Timor-oan sira liuhosi formasaun oi-oin.

Xefe Estadu, José Ramos-Horta atribui sertifikadu rekoñesimentu ba brigada mediku Kubana sira ne’ebé serbí ona povu Timor-Leste. Foto/Tome da Silva

Rekoñesimentu ne’e Ramos-Horta afirma iha nia deskursu iha ámbitu serimónia entrega Sertifikadu Rekoñesimentu ba médiku Brigada Médika Kubana na’in-66 ne’ebé remata sira-nia misaun tinan rua iha Timor-Leste, Kinta (10/04/2025)

“Ita rekoñese la’ós de’it profisionál médiku sira ho kualifikasaun, maibé belun lolos sira Timor-Leste nian ne’ebé hatudu ona ideál aas liu husi solidariedade internasionál, dotor na’in-66 ne’e hametin ona ita-nia sistema kuidadu saúde, salva ona vida sira, no transfere koñesimentu ba ita-nia profisionál médiku sira. Sira-nia dedikasaun hodi serbí ita-nia komunidade sira ne’ebé remota liu reprezenta amizade ne’ebé metin entre Kuba ho Timor-Leste,” Prezidente Repúblika hateten.

Ramos-Horta fundamenta katak serimónia rekoñesimentu ida-ne’e rekoñese servisu esepsionál husi profisionál saúde sira ne’ebé fornese ona kuidadu médiku espesializadu iha munisípiu hotu iha Timor-Leste dezde tinan 2023.

Horta dehan, sira-nia kontribuisaun la’ós de’it kuidadu direta ba pasiente, maibé inklui mós formasaun importante ba dotor, enfermeiru, no tékniku Timor-oan sira iha estabelesimentu saúde oi-oin no iha Fakuldade Medisina Universidade Nasionál Timor Lorosa’e (UNTL).

Serimónia ne’e, marka kapítulu susesu ida tan iha akordu kooperasaun kuidadu saúde ne’ebé kontinua entre Repúblika Demokrátika Timor-Leste no Repúblika Kuba, ne’ebé sai nu’udár instrumentál ba dezenvolvimentu infraestrutura no kapasidade médika Timor-Leste nian.

Biban ne’e, Embaixadora Repúblika Kuba mai Timor-Leste, Grisel Alina Aldama Inniss agradese ba Prezidente Repúblika (PR), José Ramos-Horta tanba bele fó ona rekoñesementu ba Médiku Kubana sira.

“Ha’u hakarak hahú hodi agradese ba ita-boot sira nia prezensa no ida-ne’e hanesan onra no ksolok ida atu fahe momentu importante ida-ne’e ho ita-boot. Ohin, ita sei aprezenta Diploma Rekoñesimentu husi Prezidente Repúblika Timor-Leste ba kolaboradór Médiku sira konklui sira nia kompromisu servisu iha rai-laran, hanesan parte ida hosi selebrasaun Aniversáriu kolaborasaun Kubanu ba dala-21 iha Timor-Leste. Tanba ne’e, ha’u hakarak agradese ba sira hotu ne’ebé halo ida-ne’e sai posivel, apoia, no kontinua hametin projetu ida ne’e,” Embaixadora Grisel Alina Aldama Inniss hateten.

Jornalista: Tome da Silva