Hatutan.com , (24 Abríl 2025), Díli- Serimónia taka kaixaun Papa Francisco nian, ne’ebé transfere hosi Casa Santa Marta no espozisaun ba sarani sira hodi fó omenajen, sei hala’o iha Sesta (25/04/2025) iha tuku 20:00 oras lokál, iha Bazílika São Pedro.

Lee Mós: Sábadu 26 Abríl, Loron Funeral Papa Francisco

Imajen dahuluk hosi Santu Padre ne’ebé toba iha estadu iha Casa Santa Marta. Foto/Mídia Vatikanu

Tuir nota imprensa ne’ebé publika husi Vaticano News haktuir ritu taka kaixaun ne’e prevee iha Ordo Exsequiarum Romani Pontificis (nn. 66-81) sei prezide hosi Kardeál Kevin Joseph Farrell, Camerlengo hosi Santa Igreja Romana.

“Tuir informasaun ne’ebé Gabinete ba Selebrasaun Litúrjiku Pontifísiu sira fó sai, sei partisipa mak: Kardeál Giovanni Battista Re, Dekanu Koléjiu Kardeál sira-nian Roger Michael Mahony, Kardeál Presbítero, Dominique Mamberti, Kardeál Protodiácono, no Mauro Gambetti, arcipreste Basílica Papal de São Pedro Vaticano.” Sita husi publikasaun  Vaticano News, edisaun kuarta, 23 Abríl 2025.

Sei marka prezensa mós Kardeál sira Pietro Parolin, eis-Sekretáriu Estadu Baldassare Reina, Vigáriu Jerál ba Dioseze Roma nian, Konrad Krajewski, esmoleiru ba Sua Santidade; aleinde ne’e, Monseñór Edgar Peña Parra, substitutu Sekretaria Estadu nian, Monseñór Ilson de Jesus Montanari, vice-camerlengo Santa Igreja Romana nian, Monseñor Leonardo Sapienza, rejente Uma Pontifisiál nian, Conegos  sira Kapítulu Vatikanu nian, penitensiáriu ordináriu sira Vatikanu nian, Padre sira ne’ebé sekretadu no ema sira seluk ne’ebé autorizadu hosi Padre sira seluk mestre Selebrasaun Litúrjika Pontifísiu nian, Monseñor Diego Ravelli. Ema hotu sei halibur iha tuku 7:30 kalan iha altar Konfisaun nian molok serimónia ritual taka kaixaun Papa Francisco nian hahú.

Atu fó hanoin mós katak iha ámbitu Primeiru Kongregasaun Jerál ne’ebé hala’o iha  Tersa (22/04/2025), deside ona data ba transferénsia Urna (mate-isin) Amu-Papa Francisco nian hosi Kapela Casa Santa Marta ba Bazílika São Pedro nian, ne’ebé hala’o Kuarta (23/04/2025) tuku 09:00 dadeer oras lokál.

Jornalista: Elio dos Santos