Hatutan.com, (17 Juñu 2025), Díli–Przidente Autoridade Munisípiu Aileu, João Bosco dos Santos, Tersa loraik (17/06/2025),  hato’o kexia bá Ministériu Públiku (MP) hodi kontra Komisaun Anti-Korupsaun (CAC-sigla portugés)  ne’ebé halo buka bá nia iha Munisípiu Aileu, loron 10 fulan-Juñu, foin lalais ne’e.

Lee Mós: CAC Buska PAM Aileu Tamba Deskonfia Halakon Osan Estadu

Prezidente Autoridade Munisípiu Aileu, João Bosco dos Santos, hato’o kexia bá Ministériu Públiku (MP) hodi kontra CAC, Tersa loraik (17/06/2025). Foto/Marcelino Tomae

Prezidente Autoridade Aileu ne’e  konsidera  ekipa CAC laiha mandadu buska husi Tribunal no CAC laiha karta   notifika  nia  rasik kona-bá loron, oras no fatin hodi hetan investigasaun tuir keixa ne’ebé sira simu ka rejistu iha edifisiu CAC.

“Ha’u mai hato’o keixa bá Ministériu  Públika relasiona ho asaun CAC ne’ebé mak hala’o buska bá ha’u iha eskritoriu Administrasaun Aileu, iha loron 10 fulan-Juñu 2025,” João Bosco dos Santos, informa bá Jornalista sira iha resintu  Prokurador Jerál Repúblika (PGR, sigla portugés), Díli.

Nia afirma hanesan  PAM  Aileu  representa Governu Sentrál iha kada Munisípiu, maibé CAC uza nia poder lori halao divulgasaun liu husi mídia sosiál ne’ebé maka afeta  bá  nia privasidade ne’ebé kontempladu iha Konstituisaun RDTL artigu 36 ko’alia  kona-bá diretu bá onra no privasidade.

Nia garantia Ministériu Públika maka  na’in bá prosesu penál,  la’ós CAC no tamba saída mak CAC halo buska la refleta transmite legál ne’ebé mak vigora iha  nia nasaun  ne’e.

Iha aprezentasaun keixa kontra CAC ne’e, João Bosco dos Santos hato’o pontu sira  maka hanesan, aktu ne’ebé akontese, nia  konsidera ekipa CAC halo prosesu abuju poder. Ekipa CAC la hatudu boa-vontade, boa-prátika no boa-administrasaun iha prosesu investigasaun.

Nia konsidera hahalok CAC mós la  iha imparsialidade, abuzu  poder no viola segredu justisa iha sira-nia atuasaun.  Tana ne’e, João Bosco dos Santos  husu bá Ministériu Publika atu investiga aktu abuzu poder, má-administrasaun ne’ebé hala’o husi CAC.

Autoridade lokál ne’e mós husu  ba Ministériu Publika atu investiga mós mídia  balun  ne’ebé mak públika hela aktu irregularidade no abuzu poder bá publika hatun ema nia dignidade no mós viola artigu 33 Konstituisaun RDTL direitu ba privasidade.

Nia kontinua  husu bá Ministeriu Publika atu investiga autoridade iha CAC ho orgaun komunikasaun sosiál ka mídia ne’ebé mak halo pratika abuzu  poder hodi divulga informasaun ne’ebé mak  seidauk loos.

“CAC nia atuasaun ne’e arrogante, abuzu poder, difamasaun no mós persegisaun politika,” João Bosco dos Santos  hateten.

Nia dehan, momentu ne’ebá ekipa CAC halo atuasaun bá nia laiha karta mandadu ruma husi Tribunál, tanba ne’e  maka nia bá Ministériu Públiku hodi hato’o keixa kontra CAC.

Fó hanoin fali katak Komisaun Anti-korrupsaun liuhosi Diresaun Investigasaun Kriminál,  hamutuk ho Polísia Nasionál Investigasaun Kriminál (PNSIK), Tersa (10/06/2025), hale’u tuku 10:00 dadeer, halo buska bá Prezidenti Autoridade Munisipíu (PAM) Aileu, João Bosco dos Santos iha nia knaar fatin, repartisaun Munisipíu Aileu, hodi halo identifikasaun tanba deskonfia iha indisiu uza Orsamentu Jerál Estadu (OJE) ne’ebé aloka ba Munisípiu Aileu la tuir nian regra no deskonfia aprova projetu balun la kumpre Rejime Jerál Aprovizionamentu (RJA).

Jornalista: Marcelino Tomae