Hatutan.com, (18 Juñu 2025), Díli-Projetu konstrusaun helte unidade 10 iha Díli laran kontínua la’o, máske halte ida ne’ebé konstrui iha Timor Plaza nia oin, ekipa sira Sekretáriu Estadu Asuntu Toponímia eno Organizasaun Urbana (SEATOU) sobu tiha ona.

Lee Mós: MTK Klarifika Kustu Konstrusaun Halte $96,000.00 Hetan Verifikasaun Hosi ADN

Halte ne’ebé konstrui iha área Vila-Verde, Díli. Foto/Dok

Ministru Transporte no Komunikasaun, Miguel Marques Gonçalves Manetelu, hateten projetu ne’e kontinua la’o, mezmu iha halte ida mak ekipa SEATOU sobu.

“Ha’u hanoin projetu konstrusaun halte la para  tanba la iha problema ida. Halte ida iha Timor Plaza nia oin ne’ e SEATOU ba sobu ne’ebé ha’u hakerek ona karta ba Ministériu Administrasaun Estatal (MAE) kleur ona seidauk responde,” Ministru  Miguel Marques Gonçalves Manetelu hateten ba jornalista sira iha Palásiu Governu, Kuarta (18/06/2025).

Iha sorin seluk, Felezito de Souza Araújo Chang, diretor kompañia  Carisma Unipessoal.Lda ne’ebé ezekuta projetu halte unidade 10 ho kustu $96,000.00 hateten halte ne’e iha Dili laran hamutuk 10 ho nia medida metru 10×2.

“Kona-ba espesifikasaun kona-bá halte ne’e item barak iha ne’ebá ne’e ami labele hola iha ita-nia rai, balun tenke hola husi rai-li’ur mak hanesan Aluminium Composite Panel (ACP) ho Kaca Mika milímetru 10 ne’ebé defisil tebes iha rai-laran, entaun ami tenke buka husi rai-li’ur duni,” Diretór kompañia Carisma Unipessoal Lda,  Felezito de Souza Araújo Chang  informa liuhosi komunikasaun Watshapp.

Diretór ne’e hateten sasán sira hola iha rai-li’ur ne’e presiza tempu mak hatama mai Timor-Leste, maibe sasaá balun iha ona no utiliza  daudaun ona.

“Iha parte ida mak ami nia fatin atu harii halte ne’e hasoru problema barak, la’ós kestaun foin lalais viral ne’e, maibé kestaun ne’e iha instituisaun ho instituisaun hanesan ami halo tiha SEATOU sira tun mai sobu fali, depois desizaun atu foti iha terenu ne’e deit mós la’os loron ida ka loron rua, desizaun tenke semana ba leten, ida ne’e mak impaktu tebes ba ami kompañia  hein duni desizaun ne’e sai instituisaun rezolve loos tiha lai kona-ba fatin  sira ne’ebé mak ami harii halte sira ne’e loos hotu ona, konkorda hotu ona mak ami foin hahú fila fali,” Felezito de Souza Araújo Chang hateten.

Nia informa halte unidade 10 ne’e seidauk harii hotu no foin mak harii unidade hitu (7), balun publiku utiliza ona maske kondisaun fíziku seidauk  projetu halte  seidauk atinje 100%.

“Tuir loloos publiku labele utiliza tanba seidauk atinji 100% no seidauk to’o unidade 10, katak  foin mak unidade hitu (7),” nia tenik.

Diretor Kompañia promete halte unidade tolu (3) ikus ne’e kuandu la iha ona problema ba terrenu  espera iha fulan-Jullu ka fulan-Agostu, tinan ne’e, bele finaliza no entrega ba owner projetu.

Jornalista : Juvinal Cabral dos Santos