Hatutan.com, (25 Juñu 2025), Díli– Ministériu Saúde rejista katak daudaun ne’e asu hamutuk 88  ne’ebé komunidade sira hakiak iha munisípiu sira ne’ebé pertense ba liña fronteira terrestre  pozitivu virus raiva ka rabies.

Lee Mós: Timor-Oan Na’in-Lima Mate Ona ho Virus Raiva

Ministra Saúde, Elia A.A dos Reis Amaral. Foto/Espesiál

Ministra Saúde, Elia A.A dos Reis Amaral,  husu populasaun iha munisípiu sira besik liña fronteira terrestre atu la bele husik sira-nia asu hakiak la’o fuik tanba bele afeta virus raiva.

“Husu populasaun hotu, liu-liu populasaun sira iha parte fronteira atu labele husik sira-nia asu  la’o fuik dook husi uma ninin tanba virus raiva ne’e afeta maka’as ba asu sira iha munisípiu sira iha liña fronteira terrestre,” Ministra Saúde Elia A.A dos Reis Amaral bá jornalista sira iha Palasiu Governu, Kuarta (25/06/2025).

Ministériu Saúde forma ona ekipa taskforce iha semana kotuk atu bele foti medida no kontrola asu sira ne’ebé husik fuik iha liña fronteira terrestre tanba virus raiva ne’e la’ós moras orijinadu, maibé bele dehan katak moras ne’e transportadu, nune’e iha ona liña koordenasaun ne’ebé Minstériu Saúde Timor-Leste ko’alia ona ho Ministériu Saúde Indonézia, atu tau atensaun bá iha liña fronteira entre Timor-Leste ho Indonézia atu bele kontrola virus raiva ne’e.

Iha tinan 2024 to’o agora, sistema vizilansia saúde nasionál rejistu ona  kazu 1,445 asu tata, husi ne’e asu hamutuk 96 mak pozitivu ba raiva no fatalidade na’in-lima (5), hotu-hotu konfirmadu laboratoriu pozitivu ba raiva.

Kona-bá vasina ka Vasina Anti Rabies (VAR) husi kazu 1445 hamutuk 66%  ema  asu tata mak simu ona VAR, maibe maioria mak seidauk kompleta doze 5 ne’ebe mak rekomenda ida ne’e importante tebes atu protesaun kompleta  atu evita kazu fatal.

Bazeia ba dadus husi Diresaun Nasionál Saude Publika (INSP-TL) ninian no haree ba kazu fatalidade ho ema barak mak la simu VAR kompletu no mós RIG ema barak mak la hato’o keixa ba iha parte kompetente bainhira asu tata.

Jornalista: Zita Menezes